SA ikaduhang higayon, mohangyo pag-usab si Lapu-Lapu City Mayor Junard Chan sa mga sakop Konseho nga aprobahan ang Annual Investment Plan (AIP) sa katuyoan nga ma-release na ang P236 milyones nga calamity fund.
Karong adlawa, Disyembre 28 sa 1:00 sa hapon mopatawag og laing special session si Chan alang sa samang katuyoan human nga way session nga nahitabo niadtong Disyembre 23 sa dihang ang walo ka mga konsehal wa motunga.
“Moluhod ko sa ilang atubangan. Magpakilu-oy ko alang-alang sa mga tawo kay luoy na kaayo ang mga tawo, kapuy na ang mga tawo,” matod ni Chan sa pakighinabi sa mga tigbalita.
Ang walo ka mga opposition councilors naglangkob nila ni Michael Dignos, Flaviano Hiyas, Rudy Potot, Rex Mangubat, Junrey Gestopa, Gregorio Paquibot Jr., Rico Amores, ug ex-officio member Eduardo Cuizon.
Samtang si Konsehal Dignos nipasabot pinaagi sa Messenger nga tuyo sab nila nga ma apod-apod na ang maong financial assistance ngadto sa mga apektado nga residente sa Bagyong Odette.
Buot sa Konseho nga idirekta og download ngadto sa matag barangay gikan sa Land Bank of the Philippines (LBP) account ang calamity fund nga di na ipaagi sa buhatan sa City Social Welfare and Development Office (CSWDO).
“Dili na man angayan dramahon pa na. Sakto na nga gi-una sa Konseho three days after sa super typhoon nga nag-grant og financial assistance unya agi sa barangay para madali,” reaksiyon ni Dignos labot sa giingong moluhod si Chan ngadto kanila aron sa paghangyo.
LANGAY UG ILLEGAL
Apan si Mayor Chan nagkanayon nga hayan mag-atubang siya og kasong malversation of public funds ingon man ang Konseho tungod kay illegal ang paagi nga idirekta ngadto sa barangay ang maong pundo.
“Ang steps gyud, ang gi-revert nga amount imong ibutang sa general fund ug i-transfer nimo og dunay account nga existing. Which is ang CSWDO naa silay financial assistance adto nimo i-download ang kuwarta,” pasabot sa mayor.
Sa maong paagi, dali nalang ang pagpang apod-apod sa financial assistance kon ipa-agi sa CSWDO nga maoy lead agency o office nga moatiman ilabi na panahon sa katalagman, pasabot sa mayor.
“Nganong ari man ta sa illegal ug dugay nga dia may legal ug dali?,” pulong ni Chan.
Si Dignos sa iyang bahin nagkanayon nga dili illegal ang ilang paagi nga ilahos sa matag barangay ang calamity fund ug miingon: “He (Chan) is misquoting the accounting rules, kay kanus-a man na ma-illegal ang donation?.