GIPIRMAHAN na ni Ormoc City Mayor Richard Gomez sa Lunes, December 27, 2021 ang Implementing Rules and Regulation (IRR) sa ordinansa nga maghatag og birthday ug year-end incentive sa mga rehistrado ug kwalipikado nga Persons With Disability (PWD) sa Ormoc.
Matod sa ordinansa, ang matag PWD sa dakbayan makadawat og tag P500 nga birthday gift ug laing P500 nga year-end incentive.
Giklaro ni Konsehal Jasper Lucero nga kadto lang mga ‘totally disabled’ person ang makadawat.
“Ang kadto lang totally disabled ang makadawat, pero kadtong partially dili siya apil. Ako partially PWD man ko kay di man ko makaklaro kon wala’y eyeglasses, wala ko’y labot ana,” pagpasabot ni Lucero.
Matod ni Lucero nga kadto lang sab mga registered PWD ang makadawat sa maong cash incentive. Bisan og kabus ug adunahan makadawat sa maong incentive.
“Gipangutana bitaw ko nga di raba daw gamay ra ang incentive, kadto raba indigent ang tagaan? Ako ingon, madatu ug pobre atong tagaan. It’s not about the money man gud, it’s all about recognition," dugang niya.
"Gi-recognize nato atong mga igsuon nga PWD nga they are part of the community and we have to take care of our people, that is the message behind the ordinance,” matod ni Lucero.
Matod ni Mayor Richard Gomez, nakita niya nga kinahanglan tagaan og saktong pagtagad ang mga PWD sa Ormoc mao nga nihangyo siya sa Sangguniang Panlungsod nga maghatag og budget para sa birthday ug year-end incentive sa mga PWD.
“I asked the SP to pass a budget for birthday gifts and year-end incentives for PWD. This will give full support to the improvement and well being of persons with disability. This will also support the national government’s thrust by granting these incentives to all registered and qualified PWD’s in Ormoc City,” matod sa mayor.
Si Felicidad Camay, usa ka PWD, dako ang pasalamat tungod kay natuman na ang ilang gipangandoy nga birthday incentive.
“Pasalamat mi kay natuman na gyod ang dugay na namo gipangandoy nga naa sab mi birthday gift unya wa gyod madugay ang pagpasar sa ordinansa,” matod ni Camay.