ANGAY bang malipay o maguol ang mga Oponganon nga nag-antos sa grabeng epekto sa ilang pagpamuyo ug panginabuhi sa bagyong Odette?
Kini human nga nadayon ang gihangyo nga special session sa Konseho ni Mayor Junard “Ahong” Chan sa Martes sa hapon, Disyembre 28, aron mapasar ang Annual Investment Plan (AIP), diin nalakip ang P236 milyunes nga calamity fund.
Di lang kay giaprobahan ang AIP, ila usab nga giusbawan ang calamity fund og P66 milyunes hinungdan nga nahimo na kining P302 milyunes.
Ang P302 milyunes nga calamity fund, tipik sa giaprobahan nga P317 milyunes nga AIP. Ang P10 milyunes gastuhon sa pagpaayo sa city hall samtang P5 milyunes ipamalit og generator sets samtang gihakop ang kinabag-an sa isla sa blackout.
Ilang gidugangan ang pundo kay nakita sa mayoriyang mga konsehal nga kuwang ang pasiunang pundo nga ilang giaprobahan.
“Nadasig ang Konseho nga mangita pa og dugang pundo kay kulang kaayo para sa atong mga kaigsuonang Oponganon. Mao karon December 28, 2021 gipun-an sa Konseho ang kantidad, gihimo kining P320 million,” matod sa pamahayag sa mayoriya sa mga konsehal nga gipadala ngadto sa mga sakop sa media.
Gipasabot sa mayoriya sa Konseho nga wa sila mobabag sa pag-aprobar sa P236 milyunes nga calamity fund kay ila gani kining gipasar sa mass motion sa ilang session niadtong Disyembre 20 aron itabang sa mga biktima sa bagyong Odette.
“Pero subo lang kaayo palandungon kay gibabagan sa mayor kay iya kining gi-veto,” matod sa pamahayag.
Ilang giawhag ang Accounting ug Budget Office sa pagpagawas gilayon sa pundo aron mahatag dayon ang ayuda ngadto sa mga biktima ni Odette.
Sa gihapon, ang pamaagi sa paghatag sa ayuda, ipaagi sa mga barangay, inay ngadto sa City Social Welfare and Development Office (CSWDO) nga maoy gusto ni Chan.
Si Konsehal Michael Dignos nanghinaut nga pirmahan kini sa mayor kay mao na lay kuwang.
Si Chan una nang nipasabot nga wa siya makauyon nga gidiretso sa mga barangay ang ayuda kay iyang nakita nga di makiangayon ang pagbahinbahin, dunay dagko ang pahat apan pipila lang ang mga lumolupyo.
Samtang duna say dagkong mga barangay nga gamay ra og pahat sa budget, mga hinungdan nga wa kini niya pirmahi.
Nipasabot usab ang mayor nga base sa balaud, di mahimo nga idiretso ngadto sa mga barangay ang paghatag, kinahanglan ipaagi sa CSWDO.
“Ang steps gyud, ang gi-revert nga amount imong ibutang sa general fund ug i-transfer nimo og dunay account nga existing. Which is ang CSWDO naa silay financial assistance adto nimo i-download ang kuwarta,” pasabot sa mayor.
Apan si Dignos niingon nga di kini tinuod.