PAMIBALIKID king Banwang 2021 (A Look Back on the Year 2021)
"Nu man anti kasakit ing milabas, malyari ka pa mu ring magumpisang pasibayu.” -- Buddha”
“Neng kai ing pabanwa asne binang karakal sigwa at asneng makatakut
a ing pamaglub king bayung banwa tambing yang mangabaldugang makasdang pabanwa!” -- Mehmet Murat Ildan
“Ing manuman mangabaldugang magbayu; ing maging pantas mangabaldugang magbayung parati” -- Winston Churchill
“E ka mamibye makatapitumpulu’t limang ukdu at awsan me iting bye.” -- Robin Sharma
“Buri ku la ding tagimpan ning payntungul kesa karing amlat ning milabas.” -- Thomas Jefferson
“Balang bayung umpisa manibatan king mapilang kapupusan ning umpisa.” --Seneca
***
Sinakurap ya mu ing banwang 2021 para keka, agya mang asna karakal a mengapalyari king awsan mung bye mu. Edakal a mengayalilan–migbayu a kekang kisdanan at pigmulalan anting durugang a bolang api keng daralkapan mung dusuldit lalabas king arapan mu.
Alamat mu itang dindam mu inyang kayanak-anakan mu pa at e ka pa ata magaral kanita.Ngeni, dakal a durugang a gintu dapot agyang labas-labas mu keng arapan mu e mu man papansingan uli ding aldo sinakurap dapot e mu akalingwan ing kaplas a meging bunga ding galus king kekang pilubluban at diwa.
Ating mengapalyaring mitabi karing timan a mamayutputan karing dina-dinalang lupang liwas-liwas a susulud mu bang mipampan ing tutu mung pangatau. Mesakit la ring keraklang pakamalan mu at ikang diling melakwan king pibale-bale yu a meging sangkan ba’mung pamarsalanan ing sarili mu at isipan mung metung ka ping marok a dikut inya sa’t e ka misalunan misan man king bye mu agyang laganas ing sakit a makayawa.
Pamamakbung ning Taal. Albug karing sibabalen king dane Pangulu at liniwas ne ing Mawli.Bala mu liktawan na na ka na naman ning e mayap a kapalaran na namang pasibayu inya sa’t parsalanan mu na naman ing pamaging-marok mung dikut, ne!
Kematen kang adwang kakaluguran manibat inyang bayu ka pa’ng sibul agnan da reti at dagdag la mu reti karing mengamate mu namang kakaluguran mu king napus a banwa, a megpagilid lwa karing mata mung mipipyak keng pamagpyak mu pauli ning matikding kapanamdaman a e man mekabawas king kaplas a dimdam mu karing tuki-tuking pangayangu da bye ring kakaluguran mung agnan mung migbaintau, migkyasawa at mikayanak.
Metung yang penamdaman mung bina at ding aliwa bagya mu uling agya mang akayabe mu la e da naman ikit ing malyari mung dasnan, e de kalupa ing kakaluguran mung mipalad kanita at mebating na bye kapilan pa pauli ning kalabisan agnan ning kakulangan anti karing adwang gamat a e mikasundu, kabang manintunan ya ing metung ing ikamate na yang pibuburyan na.
Alalan. Mikampi ko sana dapot kesakit mung lub ing e na ka pekibatan tambing inya sa’t deng aliwa yung kakaluguran salungat la keka. Malare kayung adwa pusu at iti yang kule ning mapupuri o nung mipapakarine. Sinakurap mu at meyala ne king gabun a malambat yung tutuklwan at ngeni karin n’ya naman makakutkut.
Ing pangayala na ning kakaluguran metung a masakit a kapalaran at metung ya mu namang migparagdag karing kaplas da lub ding keraklang memalen subali mu keka, uling deng meyala keka pakamalan la agya mang meyala la reti king kasalungsungan at akakayabe mo pa parati.
***
Dake Talabaldugan:
mipakuba (pangdiwa) mekuba, meukus king nanu mang sangkan, bigla o e sasaryan. English – slouched, hunched unintentionally for whatever reason. Alimbawa king pamangamit: “Asne kapangaya kaybat mipakuba ya inyang spukan ne dungus agyang asne kapayat mu i Milan.”
mipakubit (pangdiwa) mekubit, kiniling king nanu mang sangkan, bigla o e sasaryan. English – curved or went crooked for unintentionally for whatever reason. Alimbawa king pamangamit: “Keng lasing nang Dadung e na balu mipakubit ya ing gugulis nang larawan a ibye na sa king paglolwan na, e na melaus wala.”
mipakubug (pangdiwa) kinubug, mekubug king nanu mang sangkan, bigla o e sasaryan. English – had someone or something beaten hard unintentionally for whatever reason. Alimbawa king pamangamit: “Keng sakit na lub ning mangarana mipakubug ya keng dalig king bale ning tiliran na inyang e de rugu biklatanan agyang saguli mu.”
mipakuku (pangdiwa) menguku, mengapanguku king nanu mang sangkan, bigla o e sasaryan. English – coughed suddenly for whatever unintentional or made up reason. Alimbawa king pamangamit: “Bala nang Edung ilibri de keng apunan deng abe na dapot mipakuku yang bigla inyang ya ing singilan ning makibandi keng pipanganan.”
mipakulapul (pangdiwa) mekulapul, kinulapul king nanu mang sangkan, bigla o e sasaryan. English – got tangled up unintentionally for whatever reason. Alimbawa king pamangamit: “Mipakulapul ing pisi ning guryun keng posting kuryenti at ita ing digsu na meging sangkan ning silab keng kangatbang baranggay.”
***
Sadyang gawi at amanu da reng Kapampangan
Deng Kapampangan a tegawan a makimarakal a inanak manaspak na lang alikansya kaybat ning Pasku lakwas na retang kegisanan pang-aginaldu at deng laman ding alkansya da ilang pamye da kareng tawling dintang a makipamaskung patagal.
Kaylangan la ngeni reting pamalit papil keng bangku o keng suki mung magtinda keng palengki uling ing siping mung bale kondoktor keng bus e no buring palitan neng kaylangan na la para panyukli no kabuksan nung ali mikamwanan ne naman kareng pakasake.
Ay, marayu nang malyari pang pasibayu ing antitang manipun salapi keng alikansya uling atin nang ATM, kaybat mika-GCash na at mika-Paypal pa.
Gawing makakalingwan na naman iti.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.