SUGOD karong adlaw, Disyembre 30, 2021, ang Cebu City Government ug mga kauban niini mopahigayon og massive clearing operation o “Oplan Barug Sugbo” isip paagi sa pag-atubang sa kadaot nga gibilin sa Bagyong Odette sa Siyudad.
Nahimo ang mando human gipirmahan ni Mayor Michael Rama ang Executive Order 152, nga nagdeklara sa tibuok dakbayan sa pagtuman sa Enhanced Citywide Qualitative Health and Sanitation (ECQ-HS) Drive sa siyudad sa Miyerkules, Disyembre 29, 2021.
Ang “Oplan Barug Sugbo” nagmando sa aktibong partisipasyon sa tanang pribado ug gobyerno nga institusyon ug ubang stakeholders.
Ang ECQ-HS ipatuman sa Disyembre 30, ug Enero 2, 2022, sulod sa siyudad.
Ang mandatory nga stay-at-home order ipatuman usab ug ang paglihok sa gawas sa pinuy-anan itugot lamang alang sa katuyoan sa pagpanglimpyo, pag-access sa mga kinahanglanon, ug alang sa trabaho.
Sa press conference sa Miyerkules, Disyembre 29, si Rama niingon nga gipahibawo na ang kapulisan sa pagpatuman sa EO.
Matod ni Rama nga ang direktiba sa ECQ-HS susama sa senaryo sa panahon sa pagpatuman sa Enhanced Community Quarantine.
“Balik na lang ta sa dihang naa tay ECQ,” matod ni Rama.
Ning maong kamandoan, giawhag ni Rama ang katawhan sa pagkooperar aron dili na mag-isyu og citation ticket ang kapolisan sa paglapas sa EO.
Matod ni Rama nga daghan ang mga garbage truck ug uban pang kahimanan nga ipakatap busa kinahanglan nga ang mga karsada sa dakbayan dili kaayo ma-okupar sa mga pribadong sakyanan.
“Puyo kon walay buhaton, aron ang dalan dili ma congested. Dili ma obstructed ang lihok sa mga trak ug dili ma traffic,” matod ni Rama.
Kinsay gitugutan
Ang mga indibiduwal nga exempted sa stay-at-home order mao kadtong mga essential workers sama sa medical practitioners, emergency personnel, tanang awtorisadong opisyal ug empleyado sa gobyerno, driver ug personnel o delivery vehicles, accredited media personnel, mag-uuma, mangingisda, ug agri-business personnel.
Exempted usab ang mga tawo nga nangayo og medikal nga atensyon o naadmit na sa bisan unsang medikal nga pasilidad basta usa lang ka kauban ang tugutan.
Ang mayor nagpasiugda usab sa Bottoms-Up ug Household Approach diin sa mga may katakos nga mga sakop sa pamilya, kinahanglang moapil sa clearing ug clean-up operations ug moako sa responsibilidad sa ilang tagsa-tagsa ka mga puloy-anan.
Ang mga tagdumala ug mga pangulo sa pribadong kompaniya kinahanglan usab nga magmando sa ilang mga empleyado sa pag-apil sa clean up drive aron mapalambo ang kahimsog ug sanitasyon sa ilang tagsa-tagsa ka mga establisemento.
“Basta mo apil ang tanan, ma hawanan na and we will have a better Cebu City by January 3,” matod ni Rama.
Gitug-an usab sa mayor nga uyon si Secretary Roy Cimatu sa Department of Environment and Natural Resources (DENR) nga dili i-turn over sa DENR o sa Dakbayan ang mga kahoy gikan sa mga nangatumba nga kahoy.
Matod ni Rama nga magamit kini sa mga residente sa paghimo og mga muwebles alang sa ilang mga balay. (IRT)