GAWAS sa Japan B. League, aduna pa’y laing dagkong mga liga sa ubang mga nasod ang nipadayag og interes nga mokuha sa serbisyo sa usa sa mga tirador sa gawas sa Philippine Basketball Association (PBA) nga si Matthew Wright.

Mao kini ang gibutyag ni Wright sa interbyu ni Homer Sayson sa iyang Spin Zone column sa Spin.ph nga napatik kagahapon, Disyembre 29, 2021.

Giangkon sa pambatong guard sa Phoenix Super LPG Fuel Masters nga madanihon ang mga tanyag nga iyang nadawat apan iyang giklaro nga wala pa siya’y gitanduan bisan usa.

“It’s not relevant to speculate on the future because it’s not here yet,” matod pa ni Wright sa Spin Zone.

Si Wright, 30, naila sab sa iyang pagkamaayong modepensa gawas sa iyang three-point shooting, mga hiyas nga nakakuha sa atensyon sa mga liga sa ubang mga nasod.

Matod ni Wrigth, kinsa usa ka 6’4” Fil-Canadian, nga nahigugma siya sa basketball ug mao kini ang labing mahinungdanon alang kaniya ug dili ang pinansyal.