WAY pagtugot ang gihimo sa Konseho nga nikuha og P66 milyones aron idugang sa calamity fund sa Dakbayan sa Lapu-Lapu busa kini "invalid."
Samtang accounting office dili motugot sa pag-release sa calamity fund kon idirekta sa barangay tungod kay masangit ang 28 sa 30 ka barangays sa siyudad tungod sa ilang unliquidated nga nangaging financial assistance.
Sa sayo pa, una nang giaprobahan sa mga sakop sa Sangguniang Panglungsod ang P236 milyones nga calamity fund alang sa mga biktima sa bagyong Odettle, apan niadtong Disyembre 28 atol sa laing special session, nahimo nang P302 milyones kay gidugangan og P66 milyunes.
Nabalaka si Mayor Junard Chan nga mag-atubang og kasong malversation of public funds ang mga opisyal lakip na niya kon ipamugos ang gidugang nga P66 milyones.
“Ma-technical malversation ta ato kay di man to pwede nimong gamiton sa financial assistance,” pasabot sa mayor.
Ang gidugang nga P66 milyunes gikuha sa Konseho gikan sa pundo alang sa development projects nga adunay kinatibuk-ang kandtidad nga P76 milyones, busa P10 milyones na lang ang nahabilin.
Si City Budget Officer Judith Furuta nipasabot nga ang gikuhaan sa maong P66 milyones dili mamahimong i-realign ngadto sa laing katuyoan sama sa financial assistance.
Si Chan mitataw nga mamahimong ikahatag nga financial assistance sa Siyudad ngadto sa mga nabiktima sa kalamidad mao lang ang P236M, di ang P302M.
Nangayo og pagsabot ang mayor ngadto sa mga konstituente sa kalangay sa pag-release sa pundo, nga buot niya nga ikatunol gilayon ngadto sa mga apektadong residente.
“Maka-process man gihapon ta kay diha man silay giaprobahan nga P236 milyon, ang allowable ra gyud nato ba,” pulong ni Chan nga misaad nga iyang pangitaan og paagi nga mahatag ngadto sa mga Oponganon ang financial assistance.
MALANGAY PA
Samtang si City Accountant Helen Dungog mipasabot nga mosamot kalangay ang distribution sa pundo ngadto sa mga barangay nga maoy gusto nga mahitabo sa Konseho nga idirekta og hatag.
Pasabot ni Dungog nga una makadawat sa financial assistance ang mga barangay, gikinahanglan nga una nga iduso sa 28 ka barangays ang liquidated nga financial assistance nga ilang nadawat sa miaging pagpanghatag.
“Liquidate first your financial assistance before sa kanang current. So, mao nga madugay ug malangay,” dason ni Dungog.