GIBALIK na sa Kagamhanan sa Dakbayan sa Sugbo ang pagpamakuna batok sa coronavirus disease 2019 (Covid-19) sugod niadtong Lunes, Disyembre 27, 2021.
Apan gitataw ni Cebu City Councilor Joel Garganera, deputy chief implementer sa Emergency Operations Center (EOC), nga puro second dose lang una ang ilang gipangdapat.
Nipasabot si Garganera nga wa una nila gibalik ang first dose kay ang mga tawo karon naghuna-huna pa sa unsay ilang buhaton sa epekto sa bagyong Odette.
Duna say mga tawo nga nangabalaka sa side effect sa bakuna taliwa sa kakuwang pa sa supply sa kuryente.
Matod niya nga sa mga barangay sila nilibot sugod niadtong Lunes.
Una nilang giadto ang mga Barangay Budlaan ug Pulangbato, puro mga bukirang dapit sa north district sa dakbayan, ingon man sa Barangay Tisa.
“Nalipay kaayo ko, Bay, kay 95-97 percent ang response sa mga tawo sa barangay,” matod ni Garganera.
Matod niya nga molibot sila sa tanang mga barangay aron pag assess sa mga gym.
Kon ilang makita nga maayo ra ang kahimtang sa gym o sa dapit diin ipahigayon ang pagpamakuna, ila dayon kining pagahimuon.
Mopadayon na usab ang SM City sa North Reclamation Area sa pagpamakuna samtang gisugdan na sab niadtong Lunes sa City Health Department ang pagpamakuna sa second dose sa nataran sa city hall.
Ang Robinsons Galeria mopadayon na usab sa bisan unsa nga adlaw.
Si Garganera niingon nga si Dr. Jeffrey Ibones, hepe sa CHD, padayon usab nga naglibot sa malls ug ubang kanhi vaccination sites aron pag evaluate kon angay na bang buksan alang sa pagpamakuna.
Matod niya nga kada adlaw na ang pagpadayon sa pagpamakuna.
Ang ilang direksyon karon mao ang hingpit nga pagbalik niini kon ila nang makita ang kondisyon nga haum na alang niini.
COVID STATUS
Sa samang higayon, gibutyag ni Garganera nga lima na lang ka aktibong kaso sa Covid-19 ang naa sa dakbayan.
Gani, sa 315 ka mga tawo nga ilang gikuhaan og swab test sa Disyembre 28, way bisan usa nga nagpositibo.
Ikaduha na kini nga adlaw nga way nagpositibo sa Covid-19, dugang sa konsehal.
Apan giklaro ni Garganera nga wa kini magpasabot nga wa nay hulga sa Covid.
“Di ta angay mokompyansa kay the cities around the world, grabe na ang Covid didto,” matod sa konsehal.
Siya niingon nga kinahanglang sundon sa higpit ang gidaghanon sa mga adlaw sa quarantine sa mga tawo nga gikan sa abroad nga mosulod sa nasod.
MANDAUE CITY
Bisan ang Mandaue City nibalik na usab sa ilang pagpamakuna, apan prayoridad ang second dose, matod sa Vaccine Operations Center sa Mandaue.
Ang pagpamakuna naa gihimo sa Pacific Mall.
Naa usab silay barangay-based nga naa sa Opao Elementary School sa Brgy. Opao.
Daghan sa mga residente ug evacuees ang nagpabakuna, matod sa Mandaue City PIO.