NAGPADAYON sa pag-apod-apod og tag usa ka sakong bugas humay nga dunay sulod nga P50 kilos matag usa ang local government unit (LGU) sa lungsod sa Minglanilla.
Nahatagan na sa LGU ang mga Barangay Ward 1, Ward 2 ug Barangay Cuanos.
Niadtong Dominggo, Disyembre 26, gisugdan sa Kagamhanan sa Lungsod ang pag-apod apod sa bugas.
Ang Konseho sa Munisipyo nipasar og P90 milyunes nga budget aron ipalit og tag usa ka sakong bugas sa tanang 45,000 ka mga pamilya sa lungsod.
Niadtong Disyembre 21, giaprobahan sa Konseho ang gahin nga gipangayo ni Mayor Elanito Pena nga P90 milyunes.
Sa Disyembre 20, sila si Pena ug mga sakop sa Local Finance Council uban ni Konsehal Rajiv Enad nagtigom alang sa pagpalit og bugas nga ihinabang alang sa tanang mga pamilya sa lungsod.
Nasabutan sa tigom nga unahon ang nag-unang panginahanglan sa katawhan, sama sa pagkaon ug tubig.
Gitataw ni Pena nga way pagpinig ang paghatag, tanang pamilya makadawat bisan kinsa man ang ilang suportahan nga kandidato sa 2022 elections.
“Padayon ang atong pag-panghatag sa tagsa ka sakong bugas tag 50 kilos matag pamilya sa tibuok Minglanilla. Walay pulitika ug walay pili, tanan makadawat sa kalidad nga bugas,” nagkanayon ang lungsod.
TUBIG SAB
Ang lungsod mibutang usab og water purifying station nga makahatag og ilimnong tubig.
Ang water purifier makapagawas og 400 ka container sa tubig matag adlaw.
Sa Disyembre 23, kini hingpit nga nainstalar sa sports complex sa lungsod ug napaandar og sugod sa Disyembre 27.
Ang station mag-operate alas 9 sa buntag hangtod sa alas 12 sa udto ug ala 1-4 sa hapon kada adlaw.
Ang mahimong makakuha sa tubig mao ra ang taga Minglanilla busa gikinahanglan nga duna kay dalang kamatuoran sa pagka lumolupyo sa lungsod.
Gikinahanglan magdala ka og bisan usa niini: identification (ID) card, vaccination card (Covid-19), bill sa kuryente ug uban pang mga dokumento nga magpakita nga ikaw nagpuyo sa Minglanilla.