MANAG-AGAW gipamusil patay samtang nahinanok sa pagkatulog alas 11:00 sa gabii sa Martes sa Brgy. Kawayan, lungsod sa Dalaguete, amihanang Sugbo.
Si Dan Mico Bedolido, 18, ulitawo, nagpuyo sa maong lugar, namatay human natusaktusak sa mga bala, uban sa iyang ig-agaw nga si Roda Descartin, 26, ulitawo, construction worker.
Si Police Corporal John Vincent Pacaldo, imbestigador sa Dalaguete Police Station nga nahinabi sa Superbalita Cebu, nagkanayon nga Miyerkulis sa alas 8:30 sa buntag na gi-report ang kremin.
Si Pacaldo nibutyag nga sila si Bedolido ug Descartin didto mangatulog sa balay sa ilang iyaan nga si Emilda Villacorta.
Ang duha ka wala ma-ilhing mga killer kalit nga ning-abot sakay sa usa ka motorsiklo, ningsaka sa balay.
Sa ilang pag-abot sa taas, gipamusil dayon ang duha sa ulo ug nagkadaiyang parte sa kalawasan.
Human sa pagpamusil, nanganaog ang killers ug gipauwanag mga bala ang Mitsubishi Pajero nga giparking sa tupad sa balay.
Ningsakay sa wala matinong motorsiklo palayo sa nahisgutang lugar ang duha.
“Anang iyaan nga si Emilda nga wa sila kamay-ong sa mga suspek kay suwaw kaayong flashlight. Gipang-iwagan sila tanan dayon gipusil ang mga biktima,”dugang ni Pacaldo.
Ang motibo ilang gitan-aw posibleng pagdumot.
Sumala ni Pacaldo nga niadtong Martes sa gabii sa wala pa ang kremin, gialarma ang mga biktima sa mga barangay tanod.