NAKAHAKOT og 880 tonelada nga debris nga gibilin sa bagyong Odette ug mga basura ang mga personnel sa Kagamhanan sa Siyudad sa Sugbo sa unang adlaw sa ‘Oplan Barug Sugbo’ massive clearing operations sa Huwebes, Disyembre 30, 2021.
Naa na sab sa 80 porsyento sa kadalanan ang nahawanan sa Siyudad. Ang gihimo kagahapon, di unang higayon sa pagpanglimpyo, kay duna nay teams nga gipakatap magabii sa north ug south districts.
Si manlalaban Gerry Carillo, chairman sa Cebu City Disaster Risk Reduction and Management Office (CDRRMO), niingon nga bisan kon daghan gihapon sa mga sakyanan sa kadalanan taliwa sa executive order ni Mayor Michael Rama nga nagdili sa katawhan sa paggawas, malampuson gihapon sila sa pagpanglimpyo.
Duna ganiy mga dapit, sama sa Barangay Talamban, nga naghuot ang trapiko.
Duna silay giumol nga lima ka teams, gamit ang 50 ka dumptrucks, 12 ka payloaders, 10 ka mini dumptrucks ug walo ka skid loaders.
Matod ni Carillo nga dakong hagit kanila ang mga garbage nga gisagol sa mga debris nga gilangkuban sa kahoy nga nangaputol, mga dapat sa balay sama sa mga bungbong ug atop.
Ila usab nga gipamutol ang mga poste ug mga punoan sa kahoy nga nagbabag sa mga dalan.
Nabalaka siya nga sa mosunod nga mga adlaw magtipun-og na sab ang mga basura daplin sa kadalanan sa dakbayan, busa iyang giawhag ang mga barangay sa pagkooperar.
Samtang si Cerwin Eviota, Cebu City public information officer, niingon nga ang 880 ka toneladang mga debris ug basura gikan sa lima ka dagkong mga dapit sa dakbayan.
“From five major urban areas handled by composite City Hall departments each, Kinasang-an-Bulacao, Labangon-Punta Tres, Guadalupe, Kamputhaw-Zapatera, Mabolo-Lahug,” matod ni Eviota.
Ang clearing nilungtad hangtod sa alas 6 sa gabii kagabii.
KOOPERASYON
Gibutyag ni Carillo nga nangahimangod sila kay dunay mga barangay nga sukad sa bagyong Odette wa magpakabana sa pagpanglimpyo.
Ang Siyudad nanghatag og mga chainsaw ug uban pang mga galamiton sa pagpanghawan, apan duna gihapoy wa manglihok.
Iyang gitumbok ang tulo ka barangay sa dakbayan nga iyang giingong wa maglihok sa paghawan sa kadalanan.
Gitumbok ni Carillo ang mga barangay Labangon, Punta Princesa ug Bulacao nga wa magpakabana, bisan sa clearing sa Huwebes nga gipasiugdahan ni Rama.
Duha sa mga barangay, Punta Princesa ug Bulacao, giingon niyang nanghuwam og tag usa ka dumptruck, apan wa mosalmot sa lapad nga pagpanglimpyo.
Una silang gihatagan og memorandum ni Department of the Interior and Local Government (DILG) Cebu City head Ian Lucero, dugang ni Carillo, human usab nangunay pagsuroy sa mga barangay aron pagsusi kinsa ang wa mokooperar.