Mokabat sa 81,807 ka mga balay sa Dakbayan sa Sugbo ang giguba sa bagyong Odette nga mikuso-kuso sa Kabisay-an niadtong Disyembre 16, 2021 base sa talaan sa Cebu City Disaster Risk Reduction and Management Office (CDRRMO) sa Disyembre 29.
Ang Punta Princesa maoy barangay nga labing daghan og mga balay nga nakaangkon og kadaut nga niabot og 7,943.
Gisundan kini sa Labangon nga dunay 5,824. Ikatulo ang Buhisan nga dunay 4,309 ug ikaupat ang Lorega nga dunay 3,500 samtang 3,022 sa Mambaling.
Sa kinatibuk-ang gidaghanon, dunay 15,141 ang totally damaged samtang 41, 479 ang partially damaged.
Kining mao nga gidaghanon naglakip lang sa mga barangay nga niklaro kon pila ang totally ug partially damaged nga mga balay sa ilang jurisdiction.
Dunay pipila ka mga barangay nga diretso lang nibutang sa kinatibuk-ang gidaghanon sa mga balay nga naguba, wa magklaro pila ang partial ug kompletong naguba.
Kini sama sa Brgy. Sawang Calero nga dunay 1,150; Punta Princesa nga dunay 7, 943 ug Buhisan nga dunay 4,309.
Nakatala usab ang buhatan og 297 nga nangaangol sa ilang talaan sa Disyembre 28, labing daghan niini sa Basak Pardo, diin 150 ang gitaho. Gisundan kini sa Brgy. Inayawan nga dunay 53.
Wa hinuon nakabutang sa report kon unsay hinungdan sa ilang pagkaangol.
Nagpabilin sa 17 ang gidaghanon sa natala nga nangamatay sa bagyo.
Sa samang report sa CDRRMO, dunay average nga P21,253,740 nga gibana-banang danyos sa matag usa sa 80 ka barangay kun P1.7 billion sa kinatibuk-an.
Naapektuhan usab ang 80-90 porsyento sa mga produktong agrikultura sa 24 ka mga mountain barangay nga gibana-banang niabot og P78.9 milyunes ang danyos.