Subo nga Bag-ong Tuig ang misugat sa pamilya sa 13 anyos nga dalagita nga gidungab patay sa iyang 12 anyos nga ig-agaw nga batang babaye dihang sila nag-away sa Huwebes sa alas 11:45 sa buntag, Disyembre 30, sa Sol Carmel, Brgy. Poblacion 1, Carcar City.
Na-rescue sa kapulisan si Jane (di tinuod niyang ngan),12, tinun-an sa grade 6 samtang namatay ang iyang ig-agaw sa tambalanan nga si Mila (di tinuod niyang ngan), tinun-an sa grade 3.
Si Police Lt. Col. Allan Rosario, hepe sa Carcar Police Station nga nahinabi sa Superbalita Cebu nagkanayon nga si Jane nakaangkog samad dinunggaban sa iyang walang bahin sa lawas human maigo sa kitchen knife hinungdan sa iyang kamatayon.
Sumala pa niini nga si Jane naningil kang Mila sa utang nga P20.
“Gipaningil daw sa biktima kay gamiton na ang P20, unya nagkalalis, nagbugno kay wala bayri,” dugang ni Rosario.
Atol sa ilang binugnoay, wala makabantay si Jane nga si Mila duna diay dalang kitchen knife.
Atol sa ilang panagbugno, niibot si Mila sa iyang dala nga kutsilyo ug gidunggab ang wala nga bahin sa lawas.
Gumikan kay grabi ang kahimtang ni Jane, gidali siya sa pagdala sa Vicente Sotto Memorial Medical Center (VSMMC), apan nakabsan sa iyang kinabuhi.
Si Mila nasikop sa ilang mga silingan apan gi-turnover sa kapulisan ngadto sa Department of Social Welfare and Development (DSWD) sa Carcar alang sa pag-asikaso sa kaso niini.
Si Rosario niingon nga depende na unya sa DSWD Carcar sa ilang sa pag-assess sa kaso ni Mila.
Apan ubos Juvenile Justice and Welfare Act of 2006 ang 12 anyos way tulubagon sa mahimo niyang krimen, apan ipailawom siya sa usa ka intervention program sa social welfare office.
Ang 15 anyos pataas mahimong mapasakaan og kaso kon masuta sa evaluation nga dunay “discernment” sa paghimo sa krimen.
Ang mga ginikanan sa mga bata gikatahong mga vendor sa nahisgutang lugar ug na-shock sa insidente. Wala na marekuber sa kapulisan ang kutsilyo nga gigamit sa suspek.