Human moigo ang bagyong Odette, 23 ka mga sunog ang miigo sa Dakbayan sa Sugbo, kinabag-an sa mga dapit nag-antos sa blackout.
Ang ika 23 nga sunog niigo sa sityo Capaculan, Brgy. Tisa sa Biyernes sa buntag, Disyembre 31.
Sa kinatibuk-an sa Disyembre, 29 ka mga sunog na ang niigo, unom niini sa wa pa ang bagyo.
Sa gintang lang nga mga 13 oras, dul-an sa P2 milyunes ang danyos sa duha ka mga sunog nga miigo sa duha ka mga barangay sa dakbayan sa Sugbo una pa nitapos ang 2021.
Matod ni FO3 Emerson Arceo, investigator sa Cebu City Fire Office, ang unang sunog nga niigo sa Huwebes sa gabii, Disyembre 30, sa sityo Obca 1, Brgy. Quiot nga midanyos og P800,000 samtang sa Barangay Tisa midanyos og P900,000.
Sa besperas sa pag sugat sa Bag-ong Tuig 2022, naugdaw ang 25 ka mga balay sa sunog sa mga alas 8:26 sa Biyernes sa buntag sa Sityo Capaculan.
Si Arceo nibutyag nga ang sunog nag sugod sa balay sa magtiayong Roderick Monterola nga subay sa unang pakisayod, lampara nga nayabo maoy hinungdan sa kayo, nga mikatap ngadto sa kasikbit nga kabalayan.
Matod ni Arceo nga nahimutang sa ibabaw nga bahin ang kabalayan hinungdan nga ilang gipangsumpay-sumpay ang mga hose aron ang tubig moabot ngadto sa nangasunog nga mga estruktura.
Gideklarar nga kontrolado na ang sunog alas 9:19 sa buntag ug alas 9:31 gideklarar nga napawong.
Dugang ni Arceo nga alas 7 sa gabii sa Huwebes, ilang nadawat ang alarma sa sunog sa Sityo Obca 1 nga nagsugod sa balay sa usa ka Janice Conception, kinsa niadtong tungora uban sa iyang bana ug anak kay nanga-on sa gawas.
Nataligam-an nga kandila ang gitumbok nga hinungdan sa sunog nga nikaylap sa 17 ka mga balay.
Alas 7:19 gideklarar nang kontrolado sa mga mirespondeng bombero ang sunog samtang alas 7:25 gideklara nga fire out na.
Nanawagan pagbalik ang CCFO sa publiko sa pagmatngon kanunay sa paggamit sa mga kandila ug lampara tungod kay delikado.
Kinahanglan nga pagngon kini sa di pa biyaan kon manglakaw o mangatulog, labina kon ikaw nagpuyo sa dapit nga nagsikit sikit ang mga balay.
Kinabag-an sa mga dapit sa Dakbayan sa Sugbo wa pay supply sa kuryente hinungdan sa paggamit sa mga tawo og kandila ug lampara.