Makigtagbo si Cebu City Councilor Joel Garganera, deputy chief implementer sa Emergency Operations Center (EOC), kang Mayor Michael Rama aron hisgutan ang mga lakang kalabot sa hulga sa Covid-19 variant Omicron.
Si Garganera nabalaka sa mga kalamboan sa National Capital Region (NCR), nga ipailawom sa Alert Level 3 sugod sa Lunes, Enero 3, tungod sa nabantayan nga pagpanakod sa Omicron variant sa Metro Manila.
Si Garganera niingon nga kinahanglan mohimo og lakang ang Dakbayan sa Sugbo agi og pagpangandam aron di makasulod ang mananakod kaayong variant sa coronavirus disease 2019 (Covid-19) sa Sugbo.
Iyang hisgutan kang Rama ang mga butang nga pagabuhaton sa mga biyahidor gikan sa mga dapit ubos sa Alert Level 3.
Ang Department of Health (DOH) nipahibawo nga dunay bag-ong 10 ka mga kaso sa Omicron variant nga nabantayan ang University of the Philippines-Philippine Genome Center ug University of the Philippines-National Institute of Health.
Sa 10, pito ang imported nga kaso samtang ang tulo local nga mga kaso.
Sa pito, usa niini ang bana sa babaye nga maoy ikaupat nga kaso sa Omicron variant nga unang nabantayan.
Ang bag-ong mga kaso sa Omicron nidala na sa kinatibuk-an ngadto sa 14 dinhi sa nasod.
“We can’t afford a fourth surge, dili gyud pwede. I will sit down with the mayor re: travelers from areas under level 3,” text message ni Garganera sa Superbalita Cebu sa Sabado, Enero 1, 2022.
Matod ni Garganera nga lisod ang pag-quarantine sa mga biyahidor, labina sa overseas Filipino workers (OFW) ug returning overseas Filipinos (ROF), tungod kay human sa bagyong Odette, daghan ang nang-ukopar sa mga hotel.
Gani, fully-booked ang mga hotel tungod kay nangita og mas maayo nga kapuy-an ang mga Sugboanon tungod sa blackout ug way supply sa tubig nianang pagkasunod adlaw human sa pag-igo sa bagyo sa Disyembre 16.
Matod sa konsehal, swerte nga sa pag-igo sa bagyo ubos kaayo ang mga kaso sa Covid-19 sa Sugbo.
Sa Disyembre 29-30, way natala ang Dakbayan nga bag-ong mga kaso sa Covid-19.
Sa Disyembre 31, ang siyudad duna lay walo ka mga kaso.
“When typhoon struck, all hotels, quarantine facilities rely on crude oil. Good our cases are its lowest and there were flights diverted to other areas where they have power,” dugang ni Garganera.
Nanghinaut siya nga makapaspas pagtrabaho ang mga lineman nga nanabang sa pagpahibalik sa supply sa elektrisidad sa tibuok Sugbo.
“God forbid if our cases will spike, all our prayers are on these linemen and cooperative weather so they will hit the 80% of Veco franchise area energized by January 10,” nagkanayon ang konsehal.
Iya usab nga sultihan si Cebu City Police Office (CCPO) Director Colonel Josefino Ligan sa hugot nga pagpatuman sa mga health protocol human niya mabantayi nga daghan nang mga tawo nga wa magpakabana sa pagsul-ob og face mask human sa bagyo.
MILD APAN PASPAS
Ang duha sa tulo ka lokal nga mga kaso sa Omicron gikan sa Bicol Region samtang ang laing usa gikan sa National Capital Region (NCR), usa ka 42 anyos nga lalake nga nagpositibo sa testing sa Disyembre 3 ug gitumbok nga recovered sa Disyembre 17.
Ang duha ka mga kaso sa Bicol Region naka-recover na sab.
Matod sa DOH, nga samtang gikinahanglan pa ang klaro nga data, dunay dakong posibilidad sa local transmission sa Omicron variant.
Ang Omicron variant mas paspas nga manakod kay sa Delta variant.
Daghang mga nasod gawas sa Pilipinas nga nagkapuliki na sa pagkombate sa pagpanakod tungod sa iyang kapaspas mokuyanap.
Hinuon, matod sa DOH nga mild ang Omicron, labina sa mga tawo nga bakunado ug kadtong naka-booster.
“Omicron cases have been documented to be mild especially among those vaccinated and boosted and vaccines and boosters do work,” matod sa DOH.
Apan nipahimangno ang departamento nga dali ug paspas kaayong manakod ang Omicron variant kon di sundon ang minimum public health standards sama sa kanunay nga pagsul-ob og face mask ug pagmintinar sa social distancing.
Matod sa DOH nga 85 porsyento sa mga nangaospital sa Metro Manila di mga bakunado.
Sa sayo nilang pamahayag, ang DOH nga human nila mabantayi nga duna nay local nga natakdan sa Omicron variant, nagduda sila nga dunay local nga pagpanakod. Ilang gipahimangnoan ang publiko sa di pagkompyansa.