Tingali nakadungog na mo niining pasiaw nga kanta kon dunay mag-birthday. Matod pa sa kanta, “Happy Birthday walay manok/Dunay baboy pulos tambok.” Apan unsa ka tinuod nga nagnihit ang manok sa pagsaulog sa bag-ong tuig?
Usa ka higala niingon nga sa dayon nang bag-ong tuig niadto siya sa mga fast food outlets apan wa na silay fried chicken. Niadto siya sa usa ka restaurant apan wa nay manok sa menu. Laing higala nga tag-iya og mga restaurants niingon nga apektado sa bagyong Odette ang iyang suppliers sa manok.
Apan sa mga merkado publiko sigi man ang baligya sa manok. Sa F. Ramos Market gani, duna pay baligyang manok bisaya. Duna diay manok sa bag-ong tuig bisan pa sa tinuohan nga di kini maayong palihi kay mahimo kang kakha-tuka sa tibuok tuig.
* * *
Ang manok maoy madali-dali nga sud-an sa katawhan. Mahimo kining sinabaw, litsunon ug prituhon. Ordinaryo kaayo kini sa mga tawo. Ang bisita hawiran sa tagbalay kay ihawan og manok bisaya nga sagad kapayasan ug kamunggayan.
Dihay usa ka bisita gipangutana kon unsay iyang gusto nga luto sa manok. Ang iyang tubag mao kini, “Ang usa tuwaa, ang ikaduha litsona, ang ikatulo pritoha.”
Apan usa ka gobernador sa Mindanao niasoy kanako nga sa dihang nibisita siya sa iyang constituents sa mga bukirang dapit sa iyang lalawigan, gidalitan dayon siya ug ang iyang bodyguards og mga tinibuok manok. Moingkit na unta siya sa paa sa manok apan gipugngan siya sa lider sa barangay kay dunay espesyal nga pagkaon nga giandam alang kaniya. Sa pagtan-aw pa niya sardinas diay.
* * *
Kumusta ang supply sa karneng baboy sa Sugbo? Ang Central Visayas Pork Producers Cooperative nipasalig nga dunay igong supply sa karneng baboy sa Sugbo. Gani, ang surplus kon sobrang supply sa baboy sa Sugbo gipadala man ngadto sa Metro Manila ug ubang bahin sa Luzon nga naigo sa African swine flu.
Ang hog growers sa Sugbo apektado usab sa bagyong Odette apan ang danyos anaa lang sa P257 milyones. Ang hog industry sa Sugbo gibanabanang mobalor og P11 bilyones.
Klarong wa magnihit ang supply sa baboy sa Pasko ug sa Bag-ong Tuig labi na sa litson nga iplastar sa lamesa ug pakan-on og mansanas.