Human mahakot ang mga debris nga gibilin sa bagyong Odette sa dagkong mga karsada sa dakbayan sa Sugbo, ang sunod problema nga atubangon mao ang garbage.
Sa Lunes sa buntag, Enero 3, makigtagbo si Mayor Michael Rama kanilang mga opisyal, apil na ang mga barangay aron tukion kining mao nga suliran.
Matod ni Cebu City Disaster Risk Reduction and Management Council head manlalaban Gerardo “Gerry” Carillo, nga ilang nakuha ang tanang debris sa tanang dagkong mga karsada sa siyudad sa ikaduhang adlaw sa Oplan Barug Sugbo road clearing drive.
Nakahakot sila og mga dul-an sa 1,300 ka toneladang debris sa ilang clearing operations nga nagsugod sa alas 5:30 sa buntag sa Dominggo, Enero 2, ug gitapos sa alas 5:30 sa hapon.
Matod ni Carillo nga 1,095 ang ilang natimbang nga debris, apan dunay gibana-banang 200 ka toneladang mga debris nga ilang diretsong gipalabay sa landfill sa Binaliw kay mas pabor alang sa mga sakyanan nga gikargahan.
Nalipay si Carillo nga ang tanang mga barangay sa siyudad, labina niadtong una niyang ginganlan nanabang na sa paghakot.
Bisan sa pagsige og uwan, dala ang kusog nga hangin, way puas ang mga personnel sa Dakbayan, pinangulohan ni City Administrator Engineer Suzanne Ardosa, sa paghawan sa mga karsada gikan sa nakababag nga mga debris.
BASURA NA SAB
Apan si Carillo niingon nga human sa mga debris, sunod nga atubangon sa Siyudad mao ang nagkadaghang mga garbage daplin sa kadalanan sa dakbayan.
Si Carillo nipasabot nga ang hinungdan sa pagkatanggong sa daghang mga basura mao ang grabeng kadaut sa bagyong Odette sa mga karsada nga padulong sa Brgy. Binaliw landfill.
Dunay mga kahoy ug uban pang mga debris nga nakaali sa agianan padulong sa Binaliw samtang duna say mga barangay sa siyudad, kansang mga karsada ang nababagan, di maagian sa mga trak nga magkarga og mga basura.
Nahunong ang mga pagpanghakot og upat ngadto sa lima ka mga adlaw.
Busa, napugos ang Siyudad sa paghimong transfer station sa palibot sa Noah complex ug Inayawan landfill.
Gawas sa nakababag, nipasamot sa kalisod sa mga garbage truck mao ang kalisod sa agianan tungod sa pagsige og uwan sa Sugbo ning nakalabay nga mga adlaw.
Aron seguradong makahipos ang Siyudad, dunay ubang mga basura nga didto na gilabay sa lungsod sa Aloguinsan.
Matod ni Carillo, nanghangyo sila karon kang Toledo City Mayor Marjorie Perales nga katugtan sila sa paglabay og basura kon mahuman na pagtrabaho ang usa ka landfill nga naa nahimutang sa nahisgutang siyudad.