Call center agent nga nagdali og pauli kay motubag sa sugo sa lawas nakadasmag sa laing motorsiklo pagsugat sa Bag-ong Tuig, sa alas 7:30 sa gabii sa Biyernes, Disyembre 31, sa national highway sa Brgy. Dayhagon, lungsod sa Medellin, amihanang Sugbo.
Nalandig sa tambalanan si Renjy Reyes, 33, dunay kapuyo, taga Brgy. Don Virgilio Gonzalez, lungsod sa Medellin human niya gikadasmag si Racel Lanurias, 49, trabahante sa usa ka mall, taga Brgy. Lamintak Norte sa samang lungsod.
Si Police Senior Master Sgt. Raymond Pepito sa Medellin Police Station nga nahinabi sa Superbalita Cebu nagkanayon nga si Reyes gikan sa simbahan uban sa iyang kapuyo kay mosimba unta sa pagsugat sa Bag-ong Tuig.
Tungod kay naglain ang iyang lawas, nagdali siya sa pagpauli aron motubag sa sugo sa lawas.
Kusog ang iyang pagpadagan sakay sa iyang Honda Click sa pag-abot niya sa nahitaboan, apan kalit nga niliko si Lanurias pawala samtang iya kining gisundan.
Hinungdan nga nadasmagan ni Reyes si Lanurias ug nangalimbuwad silang duha.
Naangol ang anak ni Lanurias kinsa wa makasul-ob og helmet.