GIUSWAG sa Cebu City Treasurer’s Office ang deadline sa pagbayad sa real property tax gikan unta sa miaging Disyembre 31, 2021 ngadto na sa Enero 15, 2021.
Si Mare Vae Reyes, officer-in-charge, nipasabot nga kini tungod sa grabeng kadaut nga gimugna sa bagyong Odette.
Matod ni Reyes nga iyang gihangyo ang Cebu City Council sa pag-uswag ug niaprobar kini pinaagi sa pagpalabang og usa ka resolusyon nga giuyonan usab dayon ni Mayor Michael Rama.
Si Reyes niingon nga nasayod sila sa kalisod nga gisagubang karon sa tanang mga Sugboanon.
“Kani tungod sa atong bagyong Odette kay nakasabot ta nga lisod ibayad sa atong mga taxpayer. Kami mismo diri sa city hall naglisod sab sa pagpangolekta kay down ang atoang system,” matod ni Reyes sa Disyembre 31, 2021 nga mensahe.
Ang venue naa sa legislative building apan ilang paninguhaon nga mabalhin sa finance center sa Enero 3, apan ila pang sutaon kon mahimo ba.
Si Reyes niingon nga naglisod pa sila sa ilang internet connectivity busa nagsige pa sila og adjust.
Matod niya nga mopahibawo sila kon mabalhin na ang venue.
Lain nilang ipauswag mao ang pag renew sa business permit, kansang deadline sa Enero 10 unta apan ilang hangyuon ang Konseho ug si Rama nga lugwayan hangtod sa Pebrero 28, 2022.
Siya niingon nga angay lang nga lugwayan kini tungod sa samang problema sa connectivity sa internet.
Mao usab kini ang rason nga ila unang giundang ang ilang online assessment.
Inay magsugod sa Lunes, Enero 3, adto na usab magsugod ang renewal sa business permit sa Enero 10.
Adto kini ipahigayon sa SM Trade Hall diin ilang ikauban ang Business Permit and Licensing Office. (REV)