Pipila ka adlaw na lang unta magsaulog siya sa iyang adlaw nga natawhan, apan wa na makaabot pa ang tag-iya og mga manok igtatari human siya pusila sa Barangay Pardo, Siyudad sa Sugbo sa wala pa mailhi nga killer sa pagsugat sa Bag-ong Tuig.
Si Police Lieutenant Colonel Wilbert Parilla, deputy city director for operations sa Cebu City Police Office (CCPO), niila sa biktima nga si Miguelito Solis, 52, taga Negros Oriental. Si Solis walay trabaho apan dunay mga binuhi nga mga manok pangtari.
Si Solis gipusil patay atubangan sa gate sa Alta Vista Subdivision.
Matod ni Parilla, base sa imbestigsyon sa Pardo Police Station, gituohang personal nga bangi ang motibo sa pagpatay kang Solis.
Ang iyang pag-umangkon nga si Arfel Solis nga nahinabi sa Superbalita Cebu ug Sun Star Cebu niingon nga daw gituyo sa mamumuno ang pagpatay sa iyang uyoan atol sa pagsugat sa Bag-ong Tuig kay daghang mga pabuto nga madungog hinungdan nga way nakabantay nga gipusil ang iyang uyoan.