Human nagrabehan pag-igo sa bagyong Odette, ang Dakbayan sa Lapu-Lapu mobalik na sa ilang pagpamakuna batok sa Covid- 19 sa Lunes, Enero 3, 2022.
Apan si Lapu-Lapu City Mayor Junard “Ahong” Chan nipahibawo nga ilang gibalhin ang mga venue tungod kay ang naandan nangaguba sa bagyo.
Ang mga venue mao ang Lapu-Lapu Sports Complez, Pajo gym ug Mactan Liberty Shrine.
“Modawat kini sila og mga hamtong ug mga menor de edad nga mag pa 1st dose ug 2nd dose. Ug pwede na sad magpa-booster sa bisan asa sa tulo nga naasoy nga lugar,” nagkanayon si Chan.
Ila na sab nga ibalik ang mga pagpamakuna sa mga barangay kada adlaw.
Giawhag ang mga magpabakuna sa pagdala og identification (ID) ingon man quick response (QR) code sa mga magpa 1st dose. Alang sa magpa 2nd dose, dad-a ang vaccination card ug balidong ID.
Mga menor de edad mahimo rang mo walk-in apan kinahanglan nga magdala sa rekisitos sama sa school ID.
Ang mga ginikanan nga mokuyog sa mga bata kinahanglan nga magdala og orihinal nga kopya sa NSO birth certificate o certified true copy kon way orihinal.