TUNGOD sa sayo nga pagpahibawo sa Pagasa, ang tanan ahensya sa kagamhanan ug katawhan nakahibawo sa umaabot nga Bagyong Odette, nga mitugdon dinhi sa Cebu niadtong gabii sa Desyembre 16, 2021. Apan ang dakong pangutana, unsa ta ka preparado sa wa pa moabot si Odette?
Kadagahanan sa katawhan wa magpakita og kakuyaw kay dunay mga kalihokan-sosyal nga gihimo bisan pa sa pasidaan sa Pagasa nga usa ka makusog nga bagyo si Odette. Si Odette gitagna nga moabot dinhi sa Cebu gikan sa Surigao ug Bohol sa alas 10 sa gabii apan misayo og abot sa mga alas 9 sa gabii, ug gisaka gani ta sa Signal No. 4.
Kining NDRRMC, nga dunay sanga sa matag probinsya, dakbayan, kalungsoran ug mga barangay, maoy ahensya sa atong kagamhanan nga nag-una sa pag-atubang sa mga kalamidad sama sa bagyo ug linog ingon man sa pagpangandam sa di pa moabot ang kalamidad.
Ang nakalahi sa bagyo sa linog kay mamatikdan man kini sa Pagasa kon kanus-a moabot ug asa ang direksyon. Bisan pa pahimangno sa Pagasa hapit kada oras, apan ang kadaghanan sa katawhan nga morag naanad na sa dautan nga panahon gibaliwa lang si Odette.
Apan human sa paglabay ni Odette, nga nagbilin og dakong kadaut sa kalikasan, mga balay, ang uban naguba o nabanwas kadtong namuyo duol sa baybayon, ug walay suga ug tubig, grabe ang kalisang nga gibati sa katawhan, nga maoy hinungdan sa panic buying sa pagkaon, tubig, softdrinks, solar lamp, parol de kumbati, gasolina, krudo, ug uban pa bisan pa sa pasalig sa atong nasudnong kagamhanan nga abunda pa ta sa pagkaon, tubig, ug gasolina.
Usa sa akong nakita nga kakuwangan sa preparasyon sa mga local nga DRRMC mao ang pagpamutol sa kahoy o mga sanga niini nga naa nahimutang sa kilid sa kadalanan nga maoy hinungdan sa pagkaputol sa linya sa kurente sa Visayan Electric dihang nangaputol o natumba ang mga kahoy didto sa poste ug linya sa kurente niini. Diha na sila nilihok og pamutol sa mga kahoy nga nabali ug natumba sa kadalalan. Salamat!
Akong personal nga pasalamat sa mga lineman, kontraktor, ug opisyales sa Visayan Electric, nga nahibalik na ang suga sa kadaghanan dapit pipila ka adlaw gikan niadtong Desyembre 16, nga bisan pa sa di maayong panahon naningkamot sila mahibalik dayon ang kahayag sa gabii. Di kalikayan nga dunay mga nagbagol-bagol niadtong Desyembre 25 ug 31, nga nagsugat sa usa ka mangitngit nga Pasko ug Bag-ong Tuig.
Naa pay mga dapit karon nga wala pay suga ug tubig. Diri sa among dapit, nahibalik na ang suga niadtong gabii sa Domingo apan wala pay tubig gikan sa MCWD. Nagsige man unta og uwan, sa ato pa daghan na ang pundo nga tubig sa dam ug aquifer.
Sa lain bahin, tungod sa Odette, daghan nga mga Christmas party ug uban pa kalihokan ang gikanselar, hinungdan nga wala kayo mosaka ang infection sa Covid-19 dinhi sa ato dili sama sa NCR nga Alert Level 3 na.
Alang sa Mabungahon ug Malipayon nga Tuig 2022!