Roldan: Tuig sa tigre ug piniliay

MALIPAYONG pagsaulog sa bag-ong tuig 2022!

Kung ang niaging tuig 2021 gusto natong kalimtan tungod sa salaud nga nahimo sa Covid-19, basin ang 2022 gusto natong mahinumdoman nga maoy tuig sa pagtindog natong mga Pinoy.

Daghang tilimad-on nga makab-ot nato kini. Una, sa pagsulod sa katapusang kuwarter sa 2021 atong nakita ang pagkunhod sa ihap sa gitaptan sa virus sa dihang nagkadaghan na ang nagpabakuna ug haduol na kita sa gitawag nga "herd immunity."

Karon anaa na ang "booster shots" ug bakuna alang sa 12 anyos paubos nga maoy gikabalak-an natong mga ginikanan busa gidili pa ang "face-to-face classes" sa eskuwelahan. Bisan tuod nga gituohan nga mas kusog mokuyanap ang "Omicron virus variant", dili diay kini mas grabe sa orihinal.

Ang ikaduha mao ang taliabot nga bugnong lugaynon o eleksiyon sa Mayo 2022. Karon pa lang daan, nitaas na ang paglaum sa katawhan nga mobalik na kita sa naandan ug makapili og mga bag-ong lideres sa nasud.

Matud pa sa mga Insik nga nindot daw ang timailhan karong tuiga kay "Year of the Yang Tiger" o "Water Tiger" para sa nasud.

Ang New Year sa mga Insik kay sa Pebrero 1 ug magsugod ang Yang Tiger sa Pebrero 4 pa apan karon nakita na nila ang paglagsik sa ekonomiya sa pagsulod sa Yang Tiger nga simbolo sa paghimo og dinagkong butang ug pagbalik sa naandan.

Matud pa sa tigbantay og "zodiac sign" ang mga natawo niining tuiga kay nagbaton og taas nga kalidad sa pagpamuno ug kaisog. Dili sila mohunong kung dili nila makab-ot ang ilang gipangandoy ug gitinguha.

Maayo sila nga lider sa katilingban mao nga ang mga tigsuporta ni BBM nga natawo sa Yang Tiger nagtawag kaniya nga "roaring tiger" sa iyang kampanya pagka-pangulo karong Mayo 2022. Sulagma ra kaha nga natawo si BBM niini nga maoy nanguna karon sa daghang surbey pagka-pangulo?

Dunay nagsulti kanako nga lider sa Chinese Community sa Davao nga panahon gayud karon ni BBM nga maoy modala sa nasud ngadto sa iyang gitawag nga "Golden Age of the Philippines."

Dako daw ang purohan nga siya ang mosunod nga pangulo sa nasud bisan kung nag-atubang kini'g mga kaso sa diskwalipikasyon sa Comelec kay gitakda na kini sa bituon.

Gawas kang BBM, nagpadayon ang pagsaka sa porsiyento sa dumadapig sa iyang ka-tandem nga si Mayor Inday Sara nga gitawag sa mga Dabawenyo nga "soaring eagle" nga nakig-abin sa "roaring northern Tiger nga mao si BBM."

Hinuon mokabat pa'g 126 ka adlaw una ang piniliay busa daghan pang mahitabo una moabot ang Mayo 9. Basin adunay "realignment" sa puwersa sama sa pag-anib sa mga anaa sa oposisyon aron madugangan ang ilang boto.

Pananglitan, puwede moatras sila ni Sen. Ping Lacson ug Sen. Manny Pacquiao aron modako ang tsansa ni Vice President Leni Robredo nga maoy nagsunod kang BBM. O kaha, moatras sila VP Leni ug Sen. Manny pabor kang Sen. Lacson.

Para kanako kini lamang paagi nga ilang mapildi ang BBM-Sara tandem. Welcome Year of the Tiger!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph