Lalakeng hubog naa sa kritikal nga kahimtang nga gidala sa tambalanan kay gitabangag kulata sa 10 ka mga batan-on nga sama kaniya mga hubog.
Gawas sa pagkulata, gibunalbunalan pa nila og kahoy alas 2:15 sa kaadlawon sa Dominggo, Enero 2, 2022 sa Brgy. Sonog, lungsod sa San Francisco, mga isla sa Camotes.
Si Hermogines Aberia, Jr., 40, way trabaho, ulitawo, taga Brgy. Canonga-an sa nahisgutang lungsod nakaangkog seryosong kadaot sa ulo ug sa kalawasan.
Nasikop sa follow up operations sa kapulisan ang 10 ka mga suspek nga giilang sila si Jeboy Ledesma, 21, ulitawo, taga Brgy. Sonog; Justine Nudalo Seno, 20; Alinjun Peroso Cortez, 19; Renjil Garrido Gonzaga, 23; Fhiel Maurillo Luchavez, 29; Joven Mabalatang Luchavez, 35; Vhan Harold Luchavez Vallejo, 18; ug tulo ka mga menor.
Si Patrolman Abner Caguil, sa San Francisco Police Station nga nahinabi sa Superbalita Cebu nagkanayon nga si Aberia gikatahong hubog nga naglakaw sa karsada.
Ang mga suspek usab hubog ug nagkanta-kanta samtang gainom.
Sa ilang pagpama-uli, ilang gikasugat si Aberia kinsa gikatahong hubog ug nagmaoy.
Giingong unang gikakomprantasi ni Aberia sila si Ledesma ug menor nga si Eson.
Nahitabo ang sinukmagay dayon ang mga suspek ningkuhag kahoy, gitabangag bunal si Aberia sa ulo ug ubang parte sa kalawasan.
Daling gidala sa tambalanan si Aberia samtang ang mga suspek nadakpan sa ningresponde nga mga pulis.
Matod ni Caguil nga ang mga suspek mipadayag nga igo lang silang milaban sa ilang kaubang menor nga gitripingan ug giingong gikulata ni Aberia.
Ang mga suspek gitanggong sa San Francisco Police Station sa pagsuwat ning taho kay naghuwat pa sila sa desisyon sa mga kabanay kon mokiha ba o dili.