Ang Department of Health (DOH) nakatala na usab og kapin sa 4,000 ka mga bag-ong kaso sa coronavirus disease 2019 (Covid-19) sa nasud, nga nagdala sa kinatibuk-ang gidaghanon ngadto sa 2,855,819 sa alas-4 sa hapon sa Lunes, Enero 3, 2022.

Sa ilang Lunes nga case bulletin, ang DOH nag-ingon nga 4,084 ka dugang nga mga impeksyon ang natala, nga nagpataas usab sa kinatibuk-ang aktibo nga mga kaso ngadto sa 24,992, kun 0.9 porsyento sa tanan nga nakumpirmar nga mga pagpanakod.

Sa aktibo nga mga kaso, 795 ang asymptomatic, 19,252 ang mild, 3,051 ang moderate, 1,563 ang grabe ug 331 ang kritikal.

Ang positivity rate niabot sa 20.7 porsyento, base sa 18,587 ka samples nga nasulayan niadtong Enero 1.