Pahugtan sa Cebu City Government ang polisiya alang sa mga individual nga mosulod sa dakbayan sa Sugbo gikan sa mga dapit nga ubos sa Alert Level 3 sa quarantine restrictions gumikan sa hulga sa Omicron variant sa Sars-CoV-2 nga nagdala sa coronavirus disease 2019 (Covid-19.)
Kini ang pamahayag ni Mayor Michael Rama human siya nakigtagbo sa barangay officials, Cebu City Police Office (CPPO), department heads ug city officials nga gitambongan mismo ni Dr. Mary Jean Loreche, spokesperson sa Visayas Vaccination Operations Center (VVOC).
“Now comes this Omicron variant that has already disturbed the National Capital Region and some parts of our country. Though with mitigating measures in place, our ports are open; thus, chances are, this variant might find its way to our city,” pasabot ni Rama.
Namahayag niini si Rama human gipailawom sa miaging semana ang NCR sa Alert Level 3 sa Inter-Agency Task Force (IATF) tungod sa pagtuo sa Department of Health (DOH) nga duna nay lokal nga transmission sa Covid-19 sa Metro Manila.
Kini human usab makit-i sa kadagkuan sa panglawas ang bag-ong 10 ka mga kaso sa Omicron variant, tulo niini lokal nga pagpanakod samtang ang pito gikan sa abroad.
Duna say mga timailhan sa pagpanakod na sa Omicron variant tungod sa kalit kaayong pagsulbong sa mga kaso sa Covid-19 sa Metro Manila.
“Actually we are being guided by Dr. Loreche and I am in full agreement nga importante kaayo ang border control especially its containment. So we are going towards formulation of a very important Executive Order...For alert level 3 difinitely, we have to be very strict,” dugang ni Rama.
Atol sa tigom, si Loreche nisugyot alang sa mas estriktong border control kay siya mismo nahadlok nga ang Omicron variant naa na dinhi sa Sugbo.
Sulti ni Loreche nga ang DOH 7 nag-monitor sa mga kaso sa overseas Filipino workers (OFWs) ug returning overseas Filipinos (ROFs) nga nisulod sa Sugbo ug napalgang positibo sa Covid019, kon kini Omicron variant ba.
Hinuon way bisan usa sa mga nagpositibo sa Covid-19 taga Sugbo, taho sa Cebu City News and Information nga nagkutlo kang Loreche.
Matod ni Loreche nga ang samples nga nagpositibo ilang gipadala ngadto sa Philippine Genome Center (PGC), diin kini gipailawom sa genome sequencing aron pagsuta kon kini Omicron variant ba o di.
Apan di dayon diha-diha makuha kay molanat pa kini og duha ka mga semana ngadto sa usa ka buwan.
Iyang giawhag ang mga opisyal sa Mactan Cebu International Airport (MCIA) sa pagpatuman nga higpit sa mga health protocol sa tugpahanan.
Matod ni Loreche nga makigtagbo siya sa mga opisyal sa MCIA ug kang Gobernador Gwendolyn Garcia aron hisgutan ang Omicron variant.
RT-PCR TEST
Wala pa giklaro ni Rama kon aduna bay lockdown apan iyang gipadayag nga istriktuhon ang border control ug makig-coordinate ang City Government ngadto sa Mandaue, Lapu-Lapu ug Probinsya sa Sugbo aron aduna silay “one island policy.”
Si Rama nagkanayon nga mopagawas siya og executive order aron mabatukan ang pagkatap sa Omicron, diin magsilbing pundasyon niini mao ang Oplan Puyo.
Lakip sa gikonsiderar sa mayor mao ang pag-require sa tanang mosulod sa Cebu City gikan sa mga lugar ubos sa Alert Level 3 ang pagpaubos sa RT-PCR test aron masiguro nga dili sila magdala sa maong variant dinhi sa siyudad.
Gumikan niini, ang mayor niawhag sa mga tawo nga magpadayon sa ilang pagpabakuna aron maprotektahan ang panglawas ug kon matakdan man, dili mahimong grabe ang epekto sa virus.
Si Cebu City Councilor Joel Garganera, pangu sa Emergency Operations Center (EOC) sa Dakbayan, niingon nga kinahanglan mapanalipdan ang mga Sugboanon gikan sa mananakod nga variant.
Apan kinahanglan nga ang lakang sa Siyudad sibo usab sa mga local government unit (LGU) sa Mandaue, Lapu-Lapu ug Probinsya sa Sugbo.
“Yes, whatever it takes to protect the Cebuanos. But then again, we must have a uniform protocol in order to make it effective and practical,” pagpasabot sa konsehal.
Matod niya nga taliwa sa pagsulbong sa mga kaso sa Covid-19 sa Metro Manila, gikinahanglan ang dinalian nga lakang.
“Kanus-a man ta manguros, kanang mokilat na? Mas maayo ma-preempt nato. Dili sama sa bagyo nga dili nato mapugngan kaning Omicron,” matod ni Garganera.
Iyang giawhag ang mga Sugboanon nga magpabakuna aron kon matakdan, di mograbe ang kahimtang.