Kapin sa 5,400 ka bag-ong mga kaso sa coronavirus (Covid-19) ang nadugang sa tally sa Pilipinas, gawas sa 611 pa nga nangaayo, sa Martes, Enero 4, 2022, matod sa Department of Health (DOH).
Sa alas 4 sa hapon sa Martes nga bulletin, ang DOH nag-ingon nga ang kinatibuk-ang caseload sa nasud mikabat na sa 2,861,119 human nadugang ang 5,434 ka bag-ong mga kaso nga natala sa miaging 24 oras.
Ang mga bag-ong kaso nagduso sa aktibo nga kaso sa nasud ngadto 29,809, kun 1.0 porsyento sa tanan nga nakumpirmar nga mga kaso sa nasud.
Labing menos 889 sa mga aktibong kaso gikonsiderar nga asymptomatic, 24,026 ang mild, 3,020 ang moderate, 1,546 ang grabe ug 328 ang kritikal.
Ang DOH nagkanayon nga sa 5,434 ka bag-ong mga kaso, 99 porsiyento o 5,395 ang nahitabo gikan sa Disyembre 22 ug Enero 4.
Ang nag-unang mga rehiyon nga adunay kaso sa miaging duha ka semana naglakip sa National Capital Region (NCR) nga adunay 3,826 ka mga kaso o 71 porsyento, Calabarzon nga adunay 864 o 16 porsyento ug Central Luzon nga adunay 333 o unom ka porsyento.
Gi-report usab sa departamento sa panglawas ang 611 ka bag-ong naayo nga nagduso sa kinatibuk-ang ihap sa mga pasyente nga naulian gikan sa Covid-19 ngadto sa 2,779,706 (97.2 porsyento).
Ang ihap sa nangamatay misaka usab sa 51,604 human adunay 18 nga bag-ong nangamatay. Kini nagdala ngadto sa 1.80 porsyento sa nakumpirmar nga mga kaso.
Ang DOH miingon nga duha sa 18 nga dugang nga nangamatay nahitabo karong Enero, walo sa Disyembre 2021, duha sa Nobyembre 2021, tulo sa Oktubre 2021, usa sa Agusto 2021, ug duha sa Hulyo 2021.
Giingon niini nga nakig-coordinate na sila sa Epidemiology and Surveillance Units aron masiguro ang labing bag-ong kasayuran.
Gidugang niini nga 13 ka mga duplicate ang gitangtang gikan sa kinatibuk-ang ihap sa kaso, kay ang 13 nangaayo diay.
Ang positivity rate sa nasud, sa laing bahin, misaka sa 26.2 porsyento gikan sa Lunes (Enero 3) nga 20.7 porsyento.
Ang DOH niingon nga base kini sa 24,855 ka samples nga nasulayan sa Enero 2.
Ang World Health Organization (WHO) nagrekomendar sa positivity rate nga 5 porsyento o paubos alang sa usa ka nasud nga makonsiderar nga low risk.