Daghan ang nagtuo nga mas dako ang kadaot sa bagyong Odette kay sa bagyo nga Yolanda.
Makita kini sa gidaghanon sa mga natumba nga mga transmission towers sa mga telcos. Matod pa, sa panahon sa Yolanda, adunay 55 ka mga transmission towers sa usa ka telco dinhi sa Cebu ang nangatumba.
Sa dihang si Odette na ang mibisita, hapit moabot sa 80 ka mga transmission towers ang nangatumba.
Ingon ana ka bangis si Odette.
* * *
Matod pa sa usa ka Mayor sa Cebu, dul-an sa 3 ka bulan usa mabalik ang “normal” nga supply sa kuryente human mobisita si Yolanda.
Apan karon sa panahon ni Odette, pipila pa lang ka adlaw human sa bagyo, hinay-hinay na nga mibalik ang “normal” nga supply sa kuryente, apil na ang krudo ug ubang importanteng panginahanglan sa mga katawhan.
Bisan ang pagpanglimpiyo sa nangatumba nga mga kahoy nga nagbabag sa karsada apil ang pagseguro nga maagian na ang mga karsada tungod sa nahugno nga mga taytayan, mas dali karon sa panahon ni Odette, matod pa.Dili ko matingala.
Usa ka adlaw human mohawa si Odette sa Cebu, busy na kaayo si Gov Gwen Garcia sa pagtuyok-tuyok sa probinsiya.
Gani, sa mga lugar nga dili maagian og 4-wheels, nagsakay si Gov. Gwen og habal-habal aron lang mahibaw-an niya ang sitwasyon sa tibuok probinsiya.
* * *
Lahi kini sa us aka gobernador nga akong nahibaw-an.
Human sa bagyo, pulos yawyaw lang ang gihimo, nahimo pa gani nga vlogger, pulos pa cute-cute lang unya gihulat usa niya nga mahawan na ang mga karsada sa mga nangatumba nga mga kahoy usa pa siya misuroy sa mga lugar nga grabe ang kadaot sa bagyo.
Malipayon kayo nga nagsugo-sugo sa iyang mga sakop nga ipadali ang paghawan sa karsada, samtang nag-vlog-vlog lang siya.
Diha na nagpakita sa publiko sa dihang milabay na ang pipila ka mga adlaw human sa bagyo.
Unya samtang ang ubang gobernador busy og pangita’g paagi nga makabangon og dali human sa bagyo, ang maong gobernador kalingaw lang og bagolbol nga walay kwarta ang probinsiya pagsagang sa epekto sa bagyo.
Gawas sa bagolbol, kalingaw pod reklamo nga way nahimo ang mga ahensiya sa gobyerno pagtabang sa iyang probinsiya.
Unya mibuhi pod og mga pulong sa kahadlok nga mag-looting kuno ang mga katawhan kon dili dayon mabalik ang regular supply sa koryente, krudo, pagkaon hasta ang mga ATMs.
Gani, mihangyo pa siya nga paanhaon sa iyang probinsiya ang Army aron pagpugong sa mahitabong looting.
Susmariosep.