Magduha na ka semana ang nakalabay human kita gikusokuso sa super typhoon Odette. Apan subo kaayo palandungon nga kadaghanan kanato wala gihapon makabangon. Padayon gihapon ug nagpabilin nalukapa ang kadaghanan. Misirable gihapon ang kahimtang sa kadaghanan.
Nagpuyo gihapon ang uban sa tumang kangiub gumikan kay hangtud karon wala pa mabalik ang supply sa elektrisidad. Gumikan kay wala man gihapoy elektrisidad, wala gihapoy supply sa tubig.
Gumikan mao kini ang pangindahay sa kadaghanan kon kanus-a mobalik sa normal ang atong panginabuhi? Mobalik gyud kaha kini sa labing madaling panahon? Pero tan-aw nako dili dayon mahitabo. Dugang pa kitang magpas-an ug mag-antos. Sige na lang, ato lang antoson og agwantahon ang tanan kay gimbut-an man kini sa Kahitas-an.
REKLAMO
Bisan kon wala ako motambong sa akong trabaho niadtong miaging semana gumikan sa personal nga problema, daghan gihapon akong nadawat nga problema kabahin sa paghatag og mga ayuda sa mga nahimong biktima sa bagyo. Mipatigbabaw gihapon ang pamulitika nga gihimo sa uban.
Ang mga opisyal sa barangay nga maoy gitahasan, miunay og kuha sa mga hinabang kay sila mga biktima man usab. Alangan usab nga dili nila unahon ang ilang kaugalingon. Correct, ‘charity begins at home.’
Ug gumikan kay election season man giuna sa mga pulitiko ang ilang supporters ug mga kaalyado. Alangan og ilang unahon ang ilang kontrapartido. Basta pamulitika, ingon ana gyud. Pero ang nakanindot aning mga Bisaya, alegre o mokatawa lang gihapon o mo-survive lang gihapon luyo aning mga pagsuway. Laban lang.
WALA NA GI-HIRE
Si kanhi City Administrator Atty. Floro Casas Jr, mi-post sa iyang FB nga mipadayag sa iyang kahisagmuyo. 1) Daghan ang supporters ni anhing Mayor Edgardo Labella nga wala gi-renew. 2) Gi-terminate ang kadaghanan nga wala gi-renew.
Louy kaayo ni sila ug ang ilang pamilya. Mobotar pa kaha ni sila niining mga opisyal nga nagdala karon sa administrasyon? (bobbygnalzaro@gmail.com)