Mini bus driver gipatay sa duha ka mga tulisan nga nagmotorsiklo sa alas 9:10 sa gabii sa Dominggo, Enero 2, 2022 sa Brgy. Dungo-an, Dakbayan sa Danao.
Ang biktima giilang si Richard Capul, 59, taga Brgy. Guinsay, Dakbayan sa Danao, driver sa mini bus nga magbiyahian sa lungsod sa Carmen ug dakbayan sa Sugbo.
Si Capul nakaangkog samad pinusilan sa walang bahin sa ulo gikan sa wala pa matinong klase sa armas hinungdan sa iyang hinanaling kamatayon.
Si Police Staff Sgt. Allan Vertucio sa Danao Police Station nga nahinabi sa Superbalita Cebu nagkanayon nga si Capul nagmaniho sa iyang motorsiklo sakay ang iyang kapuyo, kinsang ngan gipugngan kay maoy saksi.
Padulong na unta sila nga mopauli sa ilang gipuy-an sa Brgy. Guinsay dihang sila giatangan, gipahunong sa duha ka mga tulisan.
Matod ni Vertucio nga ang gunman naka-t shirt og puti, dayon nisinggit nga “asa ang selpon ug kwarta.”
Apan wa gihatag ni Capul ang gipangayo sa duha ka mga tulisan hinungdan nga siya gipusil sa usa sa mga tulisan tumong sa ulo.
Si Police Staff Sgt. Gerome Pesidas, imbestigador sa Danao City Police Station nga nahinabi sa Superbalita Cebu, nagkanayon nga tulis ang motibo.
Nadala sa duha ka mga tulisan ang silver nga kwentas nga balor og P2,000.
“Pagpangayo sa mga (suspek) asa ang selpon ug kwarta, mibalibad man siya, gideretso sa pagpusil sa ulo,” dugang ni Pesidas.
Paspas nga ningbiya ang mga tulisan sakay sa usa ka itom nga motorsiklo.
Ang kapuyo nibutyag nga nakamay-ong siya sa usa sa mga tulisan kon makakita siyag balik.
Usa ka kabhang sa wala matinong armas narekuber sa kapulisan sa crime scene.