Krimen sa Cebu City sa Disyembre mitibugsok og maayo: CCPO

Crime volume sa dakbayan sa Sugbo sa Disyembre 2021 ubos og dul-an 200 porsiento itandi sa susamang buwan sa 2020.

Nakatala lang og 19 ka krimen ang dakbayan sa Sugbo gikan sa Disyembre 15, 2021 ngadto sa Enero 1, 2022, labing ubos itandi sa susamang mga adlaw sa buwan sa 2020.

Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga sa 2020, mag average silag 21 ka insidente matag semana apan sa miaging buwan mag average lang silag siyam ka mga kaso matag semana.

Ang matag buwan sa Disyembre maoy gikonsiderar nga peak season sa krimen tungod kay daghan ang moadto sa mga dagkong tindahan ug daghan usab ang oportunidad sa mga kriminal apan karon nakatala lang silag usa ka tulis.

“Considering nga peak season ni siya supposed to be a lot of incidents transpired during these days. Ubos gihapon kaayo ang atong insidente. Gani duna ra tay usa ka robbery,” matod ni Parilla.

Gipasabot ni Parilla nga ang usa sa mga hinungdan niini gumikan sa presensya sa daghang mga pulis sa karsada ug mga barangay uban sa mga force multipliers.

Wala usab nila wad-a ang posibilidad nga epekto kini sa pag igo sa bagyong Odette, diin halos mga lumolupyo sa siyudad sa Sugbo apektado.

Napun-an pa nga walay kuryente diin ang mga tawo sayo nga mamauli sa ilang kabalayan.

“This was accorded because of our also strict implementation and deployment of our personnel. Then usa sab sa nakatabang sa pag ubos sa kaso sa karon nga tuig is because of less activity, walay Christmas party kay bag-o ta naigo sa bagyo,” matod ni Parilla.

Una nang nipagawas og kamandoan ang Regional Investigation and Detective Management Division 7 sa tanang police office nga sulbaron sa labing dali nga panahon ang kaso sa tulis nga hinimoan sa motor riding suspects human ningsaka ang mga kaso sa tulis sa ubang lugar sa nasud.

Sa siyudad sa Sugbo wala pay natala nga krimen sama sa tulis nga hinimoan sa mga riding in tandem sigun ni Parilla.

Apan wala mokompyansa ang CCPO sa pagmingaw sa krimen sa siyudad sanglit mamahimong mosaka kini kon makahigayon ang mga kriminal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph