Laing 36 ka linemen ipadala sa Meralco; P5K incentive ihatag

Ang Meralco mopadala og dugang 36 ka linemen ug mga ekipo dinhi sa Sugbo sa labing dali nga panahon.

Kini ang gipahibawo ni Mayor Michael Rama human iyang personal nga nahinabi si businessman Manny V. Pangilinan, chairman sa MVP group of companies, nga maoy tag-iya sa Meralco.

Si Rama, kinsa nagpasalamat kang Pangilinan, nagkanayon nga kon dili madugangan ang gidaghanon sa mga linemen nga maoy kasamtangang nagtrabaho aron mabalik ang supply sa kuryente sa dakbayan, maabtan pa kini sa tapos buwan.

Gusto ni Rama nga sa dili pa ang Fiesta Señor, mapasiga na ang tibuok siyudad sa dili pa ang Enero 16 nga maoy kapistahan ni Snr. Sto. Niño.

“They will definitely adding more linemen from Meralco which also include equipment and hopefully it will hit Cebu City. They will also be addressing whole (Cebu) or whatever but they will not forget Cebu City,” matod ni Rama.

Ang Siyudad mosaulog hinuon sa kapistahan nga virtual ang mga kalihukan bisan sa relihiyuso.

Ang mayor nagkanayon nga nakighinabi na usab siya kang Energy Secretary Alfonso Cusi ug ni Presidente Rodrigo Duterte dihang sila nibisita dinhi sa Cebu City uban si Senador Bong Go usa ka semana human niigo si Odette aron usab pagpadangat sa samang suliran.

Samtang gipadayag sa mayor nga atimanon una niya og una ang mga pamilya nga maoy naapektohan sa bagyo.

Hatagan niya og atensyon kon aduna pa bay igong kwarta ang dakbayan para himuong insentibo sa mga linemen sa Visayan Electric Company ug mga power utilities nga nitabang sama sa paghatag og tag P5,000 nga incentives gikan sa Probinsya sa Sugbo.

INCENTIVE

Hatagan og tag P5,000 nga incentive sa Probinsya sa Sugbo ang tanang linemen nga nitabang aron mapadali ang pagpasiga sa mga lungsod ug mga siyudad sa Probinsya sa Sugbo human sa bagyong Odette.

Gipahibawo ni Gobernador Gwendolyn Garcia nga mohatag ang Kapitolyo og incentive sa mga linemen sa Cebeco 1, 2 ug 3 lakip na sa Visayan Electric.

“We will also be releasing P5,000 incentive to all of our linemen of Cebeco 1, 2 ,3 including Veco, including those involved in the rapid energization of the province,” matod ni Garcia.

Sa pagkakaron, gi-finalize pa sa kagamhanan kon pila kabuok linemen gikan sa power distributors ang mahatagan sa maong insentibo.

Matod ni Garcia pamaagi kini sa Probinsya pagpasalamat sa mga linemen sa tabang aron mapadali ang pag-ayo ug pagpabalik sa kuryente sa kalungsoran hilabi na sa mga labing naapektohang lugar tungod sa bagyo.

“Our appreciation for our distribution utility workers that work day and night and even during the holidays and for ensuring that we will be able to have power again especially sa atong vital facilities...” matod ni Garcia.

Gawas sa mga linemen, mohatag usab ang Kapitolyo og P5,000 nga incentive alang sa mga pulis sa Probinsya nga nitabang sa clearing operations sa kadalanan sa lalawigan ug rehabilitation effort sa Probinsya sa Sugbo.