Gibasura sa Regional Trial Court (RTC) Branch 10 sa Cebu City ang petisyon sa mga cause oriented group, pipila ka vendors ug homeowner's association batok sa Megawide Construction Corporation (MCC) ug mga opisyal sa Cebu City Government para mapahunong ang pag-develop sa karaang Carbon Public Market.
Sa 11 ka pahina nga desisyon ni Judge Soliver Peras, presiding officer sa RTC Branch 10, gi-deny niini ang giampo nga pag-nullify sa joint venture agreement (JVA) and related documents, writ of preliminary injunction, temporary restraining order damages and mandamus gumikan sa kakuwang sa mga ebedinsya nga ilang giduso ngadto sa korte.
"Wherefore, premises considered, this court hereby resolves to deny the motion for issuance of temporary restraining order for failure to substantiate their cause of action,"matod sa hukom ni Peras nga penetsahan niadtong Oktubre 26, 2021.
Ang Cebu City Government ubos sa liderato ni anhing Mayor Edgardo Labella ug MCC nga gipangulohan ni Engr. Edgardo Saavedra ug Louie Ferrer, niadtong Enero 11, 2021 nipirma sa JVA para pagpalambo sa 113 na ka tuig nga Carbon Market,
Kini gastuhan sa pribadong kompaniya og P5.5 bilyones alang sa first phase sa development.
Apan niadtong Septiyembre 17 sa samang tuig, ang Carbohanong Alyansa nga gi-representahan ni Anna Marie Ariosa, Sanlakas Partylist nga gi-representahan ni Teodorico Navea Ja., Akbayan Partylist nga girepresentahan ni Cristina Oganiza, Proper Ermita Homeowner's Association nga gipangulohan ni Winefredo Miro ug laing walo ka grupo sa vendors ang nisang-at sa mga kaso batok sa MCC ug Cebu City Officials para mapahunong ang gisugdan nang pag-develop sa Carbon.
Ang nahisgutang mga plaintiff nipasaka og kaso ug gustong mapahunong ang construction gumikan sa ilang pangangkon nga ang mga vendor, informal workers ug settlers sa Carbon Market area nag-antos sa kalisod gumikan sa loss of livelihood and mental being.
Sa ilang depensa, ang City Government niingon nga walay dinalian nga panginahanglan sa aplikasyon sa plaintiff para sa injunctive relief sanglit wala silay legal personality kay ang yuta ubos sa usufruct usa ka public land ug ang Siyudad maoy administrador o nagsilbing tag-iya.
"This Court is not convinced by the claims of the plaintiffs. Such general claims of loss of livelihood and mental being are natural and logical effect if the plaintiffs have a factual right that has been aggrieved due to the Joint Venture Agreement entered into by the defendants,"tipik sa desisyon ni Peras.
Ang decision sa RTC Branch 10 gihangop sa opisyal sa MCC sanglit wala nay babag sa ilang maayong tinguha pagpalambo sa dakbayan.
"We welcome this development and remain committed to ensuring we meet project milestones on time, for the benefit of vendors and the community. This project is vital to helping stakeholders recover from Typhoon Odette and the Covid health crisis," matod pa ni Anna Salgado , head sa Corporate and Brand Communications.
Si Mayor Michael Rama sa iyang bahin nagkanayon nga iyang sundon ang rule of law ug ang korte nihusay na sa maong kaso hinungdan nga magpadayon ang katukoran sa bag-ong Carbon.
Nagpasalamat siya sa Megawide sanglit ang ilang kadagkuan naminaw sa iyang mga suggestion.
"Now the court of justice has spoken, therefore there will be a message that the project has to proceed but from my end and Megawide is also sensitive about my concern," matod ni Rama.
Ang management sa Cebu2World Development Incorporated, developer sa Carbon, nagkanayon nga nagpadayon ang ilang konsultasyon uban sa mga vendors, kuramateros ug kasikbit nga komunidad para sa maong proyekto.
Sila nibutyag nga sa dili pa matapos niining buwan sa Enero, mobalhin na og sugod ang gikan sa Warwick Barracks ug tipik sa Freedom Park ngadto sa interim market building nga gi-re-model sa developer.