Hepe sa Cebu City Police Office gitakda na unta nga hulipan sa katungdanan sa dili pa ang election period sugod sa Lunes, Enero 9, 2022, apan si Cebu City Mayor Michael Rama niapilar ni PNP Chief General Dionardo Carlos nga kon mahimo ipabilin si Colonel Josefino Ligan sa iyang posisyon.
Kapin na sa usa ka tuig nga na hepe sa kapulisan sa siyudad sa Sugbo si Ligan ug gitakda na siya nga hulipan sa katungdanan.
Sa nakuha nga impormasyon sa mga tigbalita nga aduna nay nag-ung-ong nga order gikan sa Camp Crame nga sa dili pa ang election period sugod sa Enero 9, bag-o na ang director sa CCPO.
Matod ni Ligan nga adunay palisiya sa PNP organization diin kadtong naabot na sa kapin usa ka tuig angay na nga hulipan ug ibalhin og laing assignment nga kinahanglang tumanon.
“We have this organizational policy nga those handling position more than a year will be reshuffled. So it has always been the policy of the PNP organization na ipatuman. So we will abide with that because we are in hierarchical command. Mosunod gyud ta ana,” matod ni Ligan.
Apan si Rama nitug-an nga niadtong Lunes, Enero 3, nakigkita siya kang Carlos ug nihangyo nga kon mahimo ipabilin una si ligan sa katungdanan.
Iyang gipasabot ang chief PNP nga daghan og nahimo ang liderato ni Ligan sa milabay nga mga buwan ilabi na ang maayong pag dumala sa kaso sa Covid nga usa sa hinungdan nga miubos kini pag-ayo ug ang kriminalidad.
Hinuon iyang gibutyag nga sundon niya kon unsa man ang desisyon sa kadagkoan sa PNP tungod ug alang sa karera ni Ligan.
“I was very happy. In fact, I personally would have wanted Colonel Josefino Ligan to stay with us but has always a rule that hierarchy... I do not want to spoil the party within their rank. But of course I was telling the chief PNP that when it comes to the performance with the men and women in uniform in the city of Cebu, I am very much and exceptionally contented,” matod ni Rama.
Tinguha sa mayor nga si Ligan lang gihapon ang iyang chief of police tungod kay namatud-an na ang kalidad niini ilabi na sa pagbatok sa Covid 19.
Nabalaka siya sa bag-og variant sa Covid nga mao ang Omicron nga angay nga pangandaman nga dili makakatap.
Gumikan niini, gipasalamatan ni Ligan ang Kagamhanan sa dakbayan sa Sugbo nga nakita nila ang resulta sa ilang trabaho ilabi na sa pag-igo ni bagyong Odette ug ang makalilisang nga Covid 19.
Nahimong modelo ang kapulisan sa siyudad sa Sugbo sa tanang police offices sa nasud tungod sa malampuson niini nga pagpa ubos sa kaso sa Covid-19 gikan sa pag ila sa dakbayan nga epicenter sa virus tungod sa pag sulbong sa mga kaso sa sayong bahin sa 2020.
Sa pagkutlo ning balita wala pa masayri kon misanong ba ang Camp Crame sa hangyo sa mayor.
Mihangyo usab ang mayor kang Carlos nga dugangan og 300 ka personnel ang CCPO aron maoy ipakatap sa kabarangayan nga maoy mopatuman sa iyang bag-ong luwatan nga lagda sa mosunod nga mga adlaw.
Iya matod pa nga tan-awon kon angay ba nga sundon ang gihimo sa National Capital Region diin walay gitugotan nga makagawas sa Metro Manila nga dili pa bakunado tungod sa pag sulbong sa Covid 19 sa maong mga dapit.