Gimandoan ni Presidente Rodrigo Duterte sa Martes, Enero 4, 2022, ang Department of the Interior and Local Government (DILG) nga mag-assign og mga pulis sa quarantine hotels sa tibuok nasud.
Ang direktiba gihatag ngadto kang DILG Secretary Eduardo Año atol sa Talk to the People Address ni Duterte Martes sa gabii ““to prevent those who may attempt to violate the quarantine regulations that have been put in place to protect our population from Covid,” ingon ni Cabinet Secretary ug Acting Presidential Spokesperson Karlo Nograles.
Ang kamandoan giluwatan taliwala sa kontrobersiya nga naglambigit sa mga nakalapas sa protocol nga nieskapo sa ilang mandatory quarantine hotel.
Matod ni Nograles nga gimando ni Duterte ang pagdestino og mga pulis sa labing menos duha ka shift matag quarantine facility.
“Dalawang pulis in two shifts para diyan lang...So the police must have a complete authority to inquire how many or the health authorities or this tourism,” gikutlo si Duterte nga namahayag.
SA CEBU CITY
Dinhi sa Dakbayan sa Sugbo, 28 ka quarantine facilities ang ilang gibantayan sugod niadtong Lunes, Enero 3, 2021.
Matod ni Lt. Colonel Wilbert Parilla, deputy director for operations sa CCPO, nga tulo ngadto sa upat ka mga pulis ang magpuli-puli sa pagbantay 24 oras.
Ila kining gisugdan human sila makadawat og direktiba gikan sa Camp Crame human mahitabo sa National Capital Region (NCR) ang pagpanglapas sa quarantine sa pipila ka mga returning overseas Filipino (ROF), usa ini nag-party ug nakapanakod sa Covid-19.
Matod sa Presidente, gikinahanglan ang mga pulis aron masiguro nga ang mga tawo nga nagbantay sa mga pasilidad sa quarantine adunay “kompleto nga awtoridad sa pagpangutana” aron masiguro ang pagsunod sa mga lagda sa quarantine.
Sa Enero 5, ang Metro Manila dunay 297 ka quarantine facilities, matod ni DILG Undersecretary Jonathan Malaya sa usa ka press sa Miyerkules.
“So 297 times 2 equals 594 police officers. Kakayanin naman po natin ito. We have the Mobile Force Battalion whose members were assigned in police districts and stations, and others were assigned in checkpoints. They can be assigned to quarantine facilities,” matod niya.
Dugang pa niya nga nagsugod na ang PNP og random inspections sukad niadtong Disyembre 1, apan sa kamandoan ni Duterte, gilauman nga mo-assign sila og dugang mga tawo sugod sa Miyerkules o Huwebes, Enero 6.
Gipasalig ni Malaya nga ang PNP mag-deploy usab og mga personahe aron mamonitor ang mga quarantine facility sa mga lugar gawas sa National Capital Region (NCR).
Si PNP Chief General Dionardo Carlos, sa iyang bahin, niingon nga ang iyang mga personnel mopahigayon og random visits dili lang sa mga quarantine hotels sa mga lugar nga ubos sa Alert Level 3, kon dili lakip na sa mga business establishment.
Matod niya nga siguruhon sa PNP nga hugot nga ipatuman ang mga health protocol sa maong mga establisemento ilabi na nga ang NCR, Bulacan, Cavite ug Rizal gipaubos sa Alert Level 3.