HAGONOY, Davao del Sur -
GIDAKOP sa mga personahe sa Hagonoy Municipal Police Station (MPS) ang usa ka wanted nga babaye tungod sa kasong Estafa.
Ang operasyon gipangunahan ni Police Leiutenant Joselito Cortes, hepe sa Hagonoy MPS, inubanan sa kapulisan sa Bansalan Municipal Police Station nga gipangulohan ni Police Executive Master Sergeant Randy Fiel ang pagdakop sa suspek nga si alyas Tere, 38-anyos, minyo, area manager sa usa ka korporasyon ug residente sa Purok 2, Barangay Tologan, Hagonoy, Davao del Sur.
Alas 6:32 sa kagabhion niadtong Enero 5, 2022, nasikop ang maong akusado pinasikad sa warrant of arrest sa kasong Swindling/Estafa (Revised Penal Code Article 315 as Amended by Presidential Decree 1689) nga adunay criminal case number 69(21)-B, ug adunay recommended bail bond nga mokantidad og P24,000.
Ang warrant gipagula sa Municipal Circuit Trial Court 11th Judicial Region, Bansalan-Magsaysay, Davao del Sur ug gipirmahan ni Presiding Judge Solmerie Andoy Gawiden.
Nasikop ang akusado didto sa Purok 2, Barangay Tologan, Hagonoy.
Gipahabalo ang dinakpan sa iyang katungod o Constitutional Rights, gamit ang lokal nga sinultihan aron sa saktong pagpasabot sa iyang mga katungod ug sa pagkakaron gi-turnover na kini ug gikustodiya sa Bansalan Municipal Police Station para sa saktong pagproseso sa salaod nga nahimo.