DILI na mopasaka og reklamo ang ginikanan sa 10-anyos nga napunggit sa sakyanan sa usa ka municipal councilor sa Lanao del Sur.
Kini subay sa impormasyon gikan sa Marilog Police Station human naareglo sa municipal councilor ang ginikanan sa 10-anyos nga abagahon ang tanang galastuhon sa ospital.
Alas 12:05 sa udto niadtong Disyembre 31, 2021, nalagpot gikan sa lima ka metros ang 10-anyos human kini napunggit sa Innova nga gimaneho sa municipal councilor.
Subay sa mga nakakita sa hitabo, paspas ang dagan sa Innova nga mi-overtake sa nasundan niini nga sakyanan padung sa direksiyon sa Bukidnon didto sa Sitio Upper Kibalang, BarangayMarilog, Marilog District, Davao City.
Ang biktima anaa sa Southern Philippines Medical Center, samtang ang drayber nga nakapunggit temporaryo nga gikustodiya sa kapulisan sa Marilog police, apan hatagan kini og kagawasan subay sa nasabutan sa mga ginikanan sa biktima.