Mitanyag si presidential candidate Sen. Manny Pacquiao og tabang aron masulbad ang nagkainit nga panagbangi ni Olympic pole vaulter EJ Obiena ug Philippine Athletics Track and Field Association (PATAFA).
Nagkanayon ang Filipino boxing legend nga gusto niyang makita nga magtutok si Obiena sa training kaysa mag-atubang ning maong kontrobersya.
“We should stop this kind of senseless conflicts that ultimately affects world-class athletes like EJ Obiena,” pamahayag ni Pacquiao nga napatik sa www.abs-cbnnews.com.
“As a former athlete, I fully understand the feelings of EJ who sacrificed blood, sweat and tears just to get to where he is. Tulungan natin siyang magtagumpay at hindi ‘yung wawasakin pa ang kanyang mga pinaghirapan. EJ is a once-in-lifetime treasure in Philippine sports, huwag natin siyang sayangin.”
Ning bag-uhay lang, ang PATAFA mianunsyo nga ilahang gitaktak si Obiena sa national training pool ug plano sab kini nilang pasakaan og kasong estafa.
Gipasanginlan sa PATAFA si Obiena nga nagpasagad lang og gamit sa pundo nga gitagana alang sa iyang training program.
Si Obiena nipadayag nga andam siyang atubangon ang bisan unsang kaso nga isang-at sa PATAFA batok kaniya ug gusto niyang malimpyo ang iyang pangalan.
Alang kang Pacquiao, puwedeng masulbad kining maong panagbangi sa malinawon nga paagi.
Gipasalamatan sa kanhi 8-division world champion ang Philippine Sports Commission (PSC) sa paghimo og lakang aron masulbad kining maong isyu.
Nanghinaot si Pacquiao nga motuman ang tanang mga nangahilambigit hilabi na sila si Obiena ug PATAFA president Philip Ella Juico sa mga rekomendasyon sa PSC aron masulbad ang isyu.