Human kita kuso-kusoha sa bagyong Odette, ang usa sa grabeng naapektuhan mao ang mga nanginabuhi diha sa Carbon Public Market. Sama sila sa ubang mga lugar nga nanginahanglan og suporta aron makabangon ug makapadayon sa ilang inadlaw nga panginabuhi. Ang nag-una nilang problema mao ang supply sa tubig kay putol ang supply kay way elektrisidad.
Ikaduha nilang problema mao ang grabeng kahugaw sa lugar gumikan sa wala mahakot nga mga basura sa City Hall. Nasayod ba mo kon si kinsa ang mitabang kanila? Walay lain, ang Megawide Construction Corporation (MCC) nga mo-develop sa maong lugar ngadto sa world class market.
Gipadad-an sila og tubig apil ang mainom ug para panghugas ug gihakot ang nagtipon-og nga mga basura gamit ang mga trak sa MCC. Asa man tong walhong mga grupo ug mga pulitiko nga mitabang kanila batok sa development sa lugar? Gipasagdan man lagi sila. Dili na unta sila magpalingla niining maong grupo.
TABANG SA DAGHAN RA
Ang mga biktima sa kalamidad sama niadtong bagyong Odette makadawat unta og dinaliang hinabang gikan sa gobiyerbo ug pribadong sektor kon aduna pa lay insaktong sistema ang gisagop sa mga donor organization. Kini matod pa ni Senador ug Reporma Presidential candidate Panfilo ‘Ping’ Lacson.
‘Alam mo, kasi ‘pag pulitiko ‘yung nakialam, ang uunahin nilang puntahan hindi ‘yung severely or hardest-hit areas. Ang uunahin nilang puntahan ‘yung vote-rich areas. Ano, kaya maraming nagpunta doon sa malalaking probinsya, ang nakaligtaan yong maliit,’ matod pang Lacson.
Insakto si Lacson. Kon ang manghatag og hinabang adunay personal nga intensiyon, magkagubot gyud kay ang daghan mang mga botante o vote rich maoy tabangan bisan gamay lang ang biktima. Ang mga lugar nga daghan og grabing biktima apan di kaayo daghan og mga botante dili mahatagan og unang atensiyon labi pag wala ma-report sa media. Mingaw man pero mas daghan ang angay tabangan. Mao ni ang nahitabo sa ubang mga lugar nga nalaktawan. Gusto ni Lacson nga magbutang og insaktong command post aron patas ug angayon paghatag og mga ayuda. (bobbygnalzaro@gmail.com)