Ang Department of Health (DOH) nitaho kagahapon, Enero 6, sa pagkakaplag og dugang 29 ka kaso sa nasod sa highly transmissible Omicron variant (B.1.1.529) sa Sars-CoV-2, diin hinungdan sa coronavirus disease 2019 (Covid-19).
Sa ilang pamahayag, ang DOH nagkanayon nga 10 sa 29 ka mga kaso gikan sa returning overseas Filipinos (ROFs), samtang 19 ang lokal nga kaso sa National Capital Region (NCR), diin gipaubos na sa Alert Level 3 hangtod sa Enero 15, 2022.
Kini bag-ong mga kaso nihatod sa kinatibuk-ang ihap sa kaso sa Omicron variant sa nasod ngadto sa 43.
Ang DOH nagkanayon nga 14 sa 19 ka bag-ong local cases ang aktibo, tulo ang namatay na ug duha ang gisubay pa karon.
Dugang sa DOH, ang bag-ong Omicron variant cases nakita gikan sa 48 samples nga ang genome sequenced niadtong Sabado, Enero 2.
Ang DOH nasubay pa sa kondisyon sa panglawas sa mga pasahero nga uban sa 10 ROFs nga nagposotibo.
“The DOH is verifying the test results and health status of all passengers of these flights to determine if there are other confirmed cases or passengers who became symptomatic after arrival,” dugang sa pamahayg sa DOH.
Gawas sa Omicron cases, ang DOH nitaho sa dugang 18 ka Delta variant cases, diin naghatod sa talaan sa confirmed Delta infections sa nasod ngadto sa 8,497.
Samtang, napanglantawan sa OCTA Research ang kaso sa coronavirus disease 2019 (Covid 19) sa Pilipinas moabot og 20,000 karon, Biyernes, Enero 7, 2022.
“Tomorrow (January 7), the country is likely to exceed 20K new cases,” matod ni Dr. Guido David, Octa Research fellow, sa iyang Twitter account.
Dugang niya nga ang National Capital Region (NCR), gipaubos na sa Alert Level 3 hangtod sa Enero 15 tungod sa pagsaka pa sa mga kaso, gipaabot nga mobuak sa iyang record sa Huwebes, Enero 6, nga 10,000 ngadto sa 11,000 ka mga bag-ong kaso.