GIAWHAG ni Cebu Governor Gwendolyn Garcia ang kadagkoan sa lalawigan sa Sugbo nga mangandam sa tagsa tagsa ka mga lungsod ug siyudad sa pagpatuman sa health protocols ingon man pagdasig sa mga konstituente sa pagpalig-on sa panglawas kon ugaling mosulod ang Omicron variant sa Covid-19 dinhi.

Kini maoy panawagan ni Garcia atol sa tigum sa kadagkoan sa lalawigan sa Miyerkules, Enero 5, 2022 sa Kapitolyo.

Matod ni Garcia nga samtang nag atubang pa sa hagit sa pagpabangon ang Sugbo tungod sa pag-igo ni bagyong Odette, dili mahimo nga mag patong-patung pa ang hagit sa makatakod nga virus.

Hinungdan nga iyang gimandoan ang tanan nga mga mayor sa probinsya sa pagpatuman sa tanan nga mga lakang pag pugong sa pagkatap sa kagaw sa kalungsoran.

"You know that the Omicron virus is fast approaching. It’s only a matter of time. Although data shows that this is though more infectious, more contagious, but less deadly but still naa na and we cannot be dealing with both at the same time...please institute all safety protocols that we have... you know the drill, you already know the drill," matod ni Garcia.

NANGANDAM NA

Gipahibaw ni Garcia nga nagsugod na ang Probinsya pag stock sa mga ekipo sama sa oxygen tanks ug mga tambal nga gikinahanglan sa mga hospitals sa probinsya ug distrito.

"Karon pa lang, we are already stocking all of our hospitals with this new drug against Covid but we have included high dosage of vitamin C intravenous para sa mga hospital and vitamins will also be distributed to all our frontliners,"matod ni Garcia.

Subay niini gimandoan usab ni Garcia ang mga lokal nga kagamhanan nga i-set up pag usab ang mini tindahan sa Kapitolyo nga nagbaligya og mga baratong vitamin C ug ubang mga supplement nga kinahanglan alang sa pagpalig-on sa immune system.

"Let's all be vigilant and we will manage this," dugang ni Garcia.

Sa Enero 6, 2022 nga data sa Department of Health (DOH) 7, ang Lalawigan dunay 30 ka bag-ong mga kaso sa Covid-19.

Kini nidala sa kinatibu-ang aktibong mga kaso ngadto sa 223. (ANV)