GIPATUMAN Biyernes, Enero 7, 2022, ang lahugay sa mga station commanders sa Davao City Police Office (DCPO), di kini ingon nga kuwang ilang operasyon sa matag area of responsibility (AOR) kon di usa ka regular nga aktibidad alang sa mga hepe sa kapulisan diha sa usa ka siyudad.
Sumala ni DCPO Director Police Colonel Kirby John Kraft nga subay sab kini sa direktiba sa Philippine National Police (PNP) nga kinahanglan ipahigayon ang "reshuffling" sa matag station commander nga lampas sa usa ka tuig diha sa ilang pagdala sa usa ka istasyon.
Mga istasyon nga gipailawom sa lahugay mao ang Sta. Ana Police Station, diin ang kanhi hepe niini nga si Police Major Benkalin Baluan mabalhin na sa San Pedro Police Station 2. Ang mopuli mao si Police Major Jake Goles nga gikan sa Calinan Police Station 10.
Ang kanhi station commander sa Police Station 2 nga si Police Major Jack Tilcag mao na ang bag-ong hepe sa Calinan Police Station 10. Si Police Major Sean Logronio sa Talomo Police Station mao na ang bag-ong hepe sa Ecoland Police Station 15 diin iyang gihulipan si Police Major Carol Jabagat, kinsa maoy bag-ong hepe sa Toril Police Station 8.
Sa Paquibato Police Station 7 nga si Police Major Marvin Hugos mao na bag-ong hepe sa Baliok Police Station 17. Si Toril Police Station 8 Police Major Michael Uyanguren ang bag-ong hepe sa Tugbok Police Station 9, diin iyang gipulihan si Police Major Noel Villahermosa kinsa maoy bag-ong hepe sa Talomo Police Station 3.
Ang bag-ong hepe sa Paquibato Police Station 7 mao si Police Major Joenel Pederio nga maoy nahimong hepe sa Baliok Police Station 17.
Giingon ni Kraft nga kadtong mga istasyon nga duna nay mga opisyal nga bag-o lang nakalingkod, way apil sa lahugay, susama sa Marilog Police Station, Baguio Police Station, Bunawan Police Station, Buhangin Police Station ug Mandug Police Station.
Nibahad si Kraft nga mas pakusgan pa sa iyang mga bag-ong station commanders ang ilang mga tahas sa bag-o nilang mga AOR.