NATIGBASAN sa iyang asawa si “Lebron” hinungdan nga nalandig sa tambalanan alas 8:00 sa gabii sa Huwebes, Enero 6, sa Sitio Tabtuy, Tuyan, dakbayan sa Naga, habagatang Sugbo.
Apan dili ang sikat nga NBA Superstar nga Lebron James ang naospital, kon di lalakeng nag-apelyedo og Lebron, 42, minyo, walay trabaho, nagpuyo sa nahisgutang lugar kay natigbasan.
Ang nitigbas kaniya mao ang iyang asawa nga si Haide (di tinuod nga ngan), kanhi overseas foreign worker (OFW). Ang asawa nakatulog sa prisuhan human sa insidente.
Si Police Staff Sgt. Arnel Olmoges, sa Naga Police Station nga nahinabi sa Superbalita Cebu nagkanayon nga ang managtiayon nagkalalis kay si Lebron nagpa-load sa ilang selpon hinungdan nga nasuko si Haide, kay wala mananghid nga misangko sa panaglalis.
Si Haide nasuko, nikuha og kitchen knife, gitigbas si Lebron hinungdan sa pagkahiwa sa tuong bahin sa abaga. Nasikop ang asawa sa mga niresponding pulis.
“Suko kay nagpa-load siyag P50, wala mananghid. Grabing lalis kay nganong magbuot-buot, nadapatan sa (biktima), mikuhag kutsilyo ang asawa gitigbas,” dugang ni Olmoges.
Nabali ang hangin sa pagka-Biyernes alas 10:00 sa buntag, Enero 7, gipabuhian ni Lebron sa mga pulis ang iyang asawa.
Naluoy ang bana sa iyang asawa nga magpabilin sa prisuhan, miperma sa affidavit nga dili na siya mopadayon sa pagpasakag kaso.
“Nadala sa lambing-lambing ni Misis. Sweet kaayo mao nalumoy ang bana, namaulig sayo wala na mapasaka ang kaso,” sumala ni Olmoges.
Si Haide nibutyag sa mga pulis nga iyang natigbasan ang iyang bana human siya gidapatan niini.