" Ngana ning Kakataskatasang panginwan: Makamal Kung kakaluguran, masikanan-takde Ardyun, makirandam kang pasibayu king kakataskatasan kung amanu,
a Kanakung idake keka para king kapakinabangnan mu a layun munye kekang maragul a tula.
Ala karing lupung ding diwata o karing dakilang byasa ing makibalu king pigmulan Ku, uling, king sablang kagalangan, Aku ing penibatan da ring diwta at ding mangabyasa.
Yang makibalu Kanaku anting e mibait, anting alang kamumulan, anting Kakataskatasang Panginwan ding sablang labwad—ya, e melibo libutad ding tau, mikabus ya karing sablang kasalanan.
Katalinwan, belwan, katimawan king pamikakunu at kalibawan, kapatawaran, pangamakatutwan, pamanampat king sarili at kataimikan, tula at kasakitan, beytan, kamatayan, takut, kelangtakut, kelangkatampalasanan, katatagan, kasapatan, pamagdimut, pamidake, pangabantug at kalausan Aku mu ing kabud linalang.
Ding pitung mangabyasa at bayu ila ding aliwang apat a mangabyasa at ding Manu [pipimpunan ding ketawan] misapwak la king isip Ku, at ding sablang lelangan king labwad ayti menibatan la karela.
Ninu mang makibalu king ligayang ayni at upaya Ku darapat yang alang-salat a makatagulaling a kasuywan; kaniti alang kapikakunwan.
Aku ing pigmulan ding sablang makadiwa at makayatung labwad. Segana-gana manibatan Kanaku. Ding byasa a makibalu kaniting kisnang kapantasan darapat makaparikil a kasuywan kanaku layun sasamban da Ku kabilugan ding pusu ra.
Ing pamisip ding tibubus kung talasuyu magsantung la Kanaku, ing bye da makasuku Kanaku, at manikwa lang maragul a kasapatan at ligayang mipanaslag karelang tunggal-tunggal at mipagsalita la dikil Kanaku.
Karelang parating susuyu at sasamba Kanaku king pamalsinta, pagkalub Ku karela ing pamisanak nung makananu lang miras Kanaku.
Kapamilatan ning pakalulu Ku karela, Aku, makatuknang karing pusu ra, lalasakan ku kapamilatan ning maslag a sulugi ing dalundum a misapwak king kelambelwan.”
~ Dalit ning Kakataskatasang Panginwan Dangka 10, Sunis 1 -10
(The Song of God 10:1-10)
***
Deng e manwala king Dyossangkan da inya e la manwala uli kanung e de akakit at e taya apakit karela ing Dyos. Ninu reti? Ila ring taung bala da balu da na ngan ing sabla uli ning karelang labis-labis a talanga o lawe king karelang sarili.
Ing panwalan da mu ya pin ing nung nanung agyu dang palub at nung nanu mu ing buri dang ilulan keng sarili dang isip agpang king karelang pamipaulaga karing bage-bage makasut king karelang panglasa. Nung e da kapangan o e makabage king karelang panglasa o makatakup a pamisip kaylyan da mu at para karela e tutu. Nung e la numabang king nanu mang katutwan a iyapag ding ninu man karela e da isubu at lakwas nang e da yakmul iti.
Ninu reti? Deti keraklan ala lang sasamban a Kakataskatasang Panginwan; ala lang kikilalanan a lakwas matas karela o nung atin man, deta mung ating lang nabangnan. Mekad deng sikat a artistang kapad da o sikat a magkantang asda kaburi uling panibatan na la niti ning karelang ikatula o ikasaya.
Ninu reti? Atin mu namang mapilan a ating kikilalanang Ginu dapot iting kikilalanan at sasamban da ya pin ing para karela makabage king sadya da nang buring panwalan e uli namu ning sasabyan na’t paltutwan ning Banal a Kasulatan itinung e uling milalapat iti king pangsarili dang pigampa o vision o kelang pigampa pauli ning karelang ketasan lub.
Ding banal a kasulatan karing sablang kasalpantayanan mitugma-tugma la karing pekamaulagang turu o aral da reti o karing amanu ning Dyos a makapalub at makasulat kareti at e la misala-salungat anti ring misalang-salang kasalpantayan karing tau. Akit tamu iti nung atin tamung katapatan o malinis a pilubluban at kapanaligan king alang-angga at alang pamangabiran a lugud at pakalulu ning kekatamu ngang Ibpang Kakataskatasan.
***
Dake Talabaldugan:
mikulub (pangdiwa) mekulub, mikulung keng metung a bage makakulub. English – got enclosed with something unintentionally or unplanned. Alimbawa king pamangamit: “Mikulub la reng ulam nang Sendung keng tapayan nung nu no kebit Biring inya kayakit da mabangnas na la.”
mikulul (pangdiwa) milupa la kulul o kule, adwa o labis pang bage o taung mikule o miyawig kule. English – Things that are of the same color. Alimbawa king pamangamit: “Bala da mikapatad la reng atlung magaral agnan palub keng pipagaralan da uling mikulul la ngan piblas.”
mikulung (pangdiwa) mekulung, misukul o mesukul, milub king sukulan o makasarang silid o gusali. English – got imprisoned or jailed unintentionally or unplanned. Alimbawa king pamangamit: “Mikulung ne dapat ing matwang mapanako oneng pepalaya ne ning sinopan nang pekapun a sinopan na namang manyambut bayu ya miyatulan.”
mikulutun (pangdiwa) mekulutun, mengakulutun, mibuknul-buknul, mengabuknul-buknul, megutgut, mengagutgut-gutgut, mesapunggul, mengasapa-sapunggul. English - something that got entangled unintentionally or accidentally. Alimbawa king pamangamit: “Mikulutun ya ing sati ning guryun nang Tibu inya mebulus ya at pinaid ne ning angin keng kangatbang ilug.”
mikumari (pangdiwa) babai at babai o babai at lalaki a mikasundung magi yang tegawan ing metung king anak ning metung; mikalugurang matalik a babai at babai o babai at lalaki. English – two or more women and a man or men whose child was made a godchild of any of them. Alimbawa king pamangamit: “Mipanyubli la kanung kandila ding mikumari uli ning indredus a pengalat mna king mabilug a baranggay ning metung karela.”
***
MIYAWIG KABALDUGANG AMANU TAMU
Makasora. Makasumami. Makakulami. Makabuysit (ibat king salitang English a “bullshit”). Miyawig-awig la kabaldugan ding amanung mebanggit at mangabaldugan lang “got pissed off, got annoyed, got turned off by something, some event or someone’s deed, action or attitude.”
King Kapampangan o amanu tamu, panamdam a bunga ning dapat, amanu, panugali ning o ding tau, kapalyaryan a penamdaman ning aliwa.
Alimbawa: “Makasora/makasumami/makakulami ing terak da reng kayanakan ngeni dapot akakasanayan da na deng keraklan inya bala maging manayun na naman karing mapilan a makiburi.”
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.