Moawhag ko sa mga tigsuporta ni Ferdinand ‘Bongbong’ Marcos Jr. nga naay Covid nga sundon ang maayong ehemplo sa ilang idolo. Kay basin og naa mo niining matawag nato nga Marcos Jr. variant. Gitawag kini sa pipila ka mga Netizens og Zoomicron.

Makaingon kita nga pasiaw kining akong lindog. Apan tinuod baya nga si Marcos Jr. wala mopakita og video ug wala sab mosugot nga mag-Zoom sa iyang hearing sa Commission on Elections (Comelec) sa miaging pipila ka adlaw.

Hearing kini kabahin sa usa sa mga protesta nga gisang-at batok kaniya kay nakonbikto baya kini siya sa kasong wala mobayad og buhis.

Gusto sa mga nagreklamo nga ma-disqualify siya o ma-cancel ang iyang kandidatura. Pwede ba diay molansar pagka presidente ang nakumbikto na nga tax evader? Pwede ba sab modagan ang usa ka tawo nga namakak sa iyang certificate of candidacy?

Aw, alang sa mga nagpakabuta-bungol sa kamatuoran, kinahanglang modaog gyud si Marcos Jr. aron mabahinan ang Pilipinas sa Tallano gold. Napruyba na gud kini nga bakak apan daghan man ang motoo gihapon.

Sa maong hearing sa Comelec, niingon ang abogado ni Marcos Jr. nga wala siya mag-Zoom kay kuyaw makatakod.

Ah, belib ko sa palusot. Concerned diay si Marcos Jr. sa kaayuhan sa Comelec ug ni Comelec Commissioner Rowena Guanzon.

Natural, nasuko si Guanzon. Mabaw gyud kaayo ang maong bakak. Klarong walay pagtahod si Marcos Jr. sa Comelec.

Sigi na lang. Bakakon man gyud na si Marcos Jr. Pero sa laing anggulo, basin diay kon naa gyuy bag-ong variant nga makatakod pinaagi sa Zoom? Kay si Marcos Jr. man ang unang natakdan niini, busa akong gipanganlan og Marcos Jr. variant.

Omicron

Pwera sa pasiaw, di kita angay mokumpyansa niining Omicron variant. Moingon sila nga mild ra kuno. Apan naa bayay mga taho sa gawas sa nasud nga nangamatay tungod sa Omicron. Buot ipasabot, ang Omicron makapatay.

Apan, samtang mas paspas kini makatakod, mas gamay ra daw ang nahospital kay madaladala ra man kini kasagaran.

Ang ako lang ba, maghuwat pa ba diay kita nga kitay mahimong pruweba kon makapatay ba o dili? Mag-estrikto na kita sa atong pagsunod sa health protocols.

Nabalaka lang ko sa Sugbo tungod niadtong balita nga gipa-relax na hinuon ang mga protocol nga makasulod ang mga returning overseas Filipinos (ROFs) ug mga overseas Filipino workers (OFWs) anha sa Mactan-Cebu International Airport (MCIA).

Naapil na man gud sa katapusan nakong basa, ang Syudad sa Lapu-Lapu sa gipatas-an nga alert level. Duol na kaayo kini sa mainland Cebu.

Moapil ko og awhag sa Kapitolyo nga pahugtan unta ang mga protocol sa makasulod sa Sugbo. Ulahi na kon ang mga mayor pa ang mobadlong sa pagpanakod diha sa mga lungsod. Unta, anha na nato pugngan nga dili makasulod ang mga ROF ug OFW nga dunay Omicron.

Dayon, dugangan nato ang atong mga doctor ug nars sa mga district ug provincial hospitals.

Kay adunahan man kaayo ang Kapitolyo, ipanghatag na lang unta isip ayuda ang mga Vitamin C imbis mag-abli og tindahan bisan pag barato ang baligya. Dili na lang unta i-negusyo ba.

Dayon, imbes politika ang unahon, palihug, mag-information campaign na ang Kapitolyo sa pagpamakuna. Iwit baya ang Lalawigan sa Sugbo sa pagpamakuna. (DM nako sa @anol_cebu)