Menor de edad nga giingong nangita og signal sa cell phone namatay human nakuryentihan sa live wire alas 10:30 sa gabii sa Biyernes, Enero 7, 2022 sa Sea Wall, Brgy. Flores, lungsod sa Catmon, amihanang Sugbo.
Ang biktima giilang si Jessie Tanjay, 17, ulitawo, taga Sitio Tabok, Brgy. Macaas, lungsod sa Catmon, kinsa patay nang niabot sa tambalanan sa silingang lungsod sa Sogod.
Si Police Corporal Gemar Arigo, imbestigador sa Catmon Police Station nga nahinabi sa Superbalita Cebu, nagkanayon nga si Tanjay uban sa duha ka batan-ong mga babaye nga iyang mga higala, ingon man laing menor nga lalake nagkuyog pagpangadto sa seawall.
Ang tulo ka mga higala ni Tanjay ningtug-an miadto sila sa daplin sa baybayon sa Brgy. Flores aron makakuhag signal sa cell phone.
Ang dapit dunay kusog kaayo nga signal busa paspas ang internet hinungdan nga bisag layo, ilang gilakaw aron maka-text, tawag ug maka chat o maka Facebook.
Sumala sa mga kauban mga samtang nanglingkod sila sa daplin sa baybayon, nibarog si Tanjay, ug niisa sa tuong kamot.
Apan pag-isa, iyang nahikapan ang live wire sa kuryente hinungdan nga mikirig.
Dali nilang gidala sa tambalanan si Tanjay apan patay nang niabot gumikan sa kakusog sa boltahe sa kuryente. Atol sab sa maong oras niuwan, wala sila kahibawo nga dunay live wire.
“Kana nga area gud, gawas nga kusog ang signal, bugnaw kaayo unya abutanan sa manag-uyab. Kini sila mga batan-on tan-aw namo nagdate-date,” dugang ni Arigo. Gibutyag niya nga sa ilang imbestigasyon, walay foul play ang kamatayon ni Tanjay.
Ang ilang lugar sa Brgy. Macaas duna nay kuryente human sa Bagyong Odette. Apan sila si Tanjay ug mga higala aktibo sa social media mao nga nangita og paagi nga makakuha og signal.