Gilaspag sa kainit sa mga kamot sa Miami Heat ang inilog ug league-leading Phoenix Suns, 123-100, sa NBA regular season game didto sa Phoenix, Arizona kagahapon.

Bisan paman kuwang sila sa players, wa mopakita’g kakurat ang Heat og mitabla kini sa ilang franchise record nga 22 ka three-pointers aron silaton ang Phoenix sa ilang mismong balwarte.

Si Tyler Herro mimugna og 33 puntos samtang si Duncan Robinson miamot og 27 puntos nga maoy mipasiga pagmaayo sa nagdilaab nga opensa sa Heat.

Ang Heat misulod sa duwa nga kuwang og players, lakip sa inactive list mao ang ilang pambato nga si Jimmy Butler.

Nakakita og bayani ang Heat kang Herro ug Duncan nga puros gikan sa bench.

“I just really continue to commend our group for staying in the moment, focusing on solutions and figuring out a way to improve and play good enough to win,” matod sa Filipino-American coach Erik Spoelstra.

Ang Heat mitali og 50 porsiyento nga shooting percentage sa three-point area. Si Robinson nipasulod og walo ka tres sa iyang 16 ka itsa, apil na ang duha sa fourth quarter nga maoy nakapahagba sa Suns.

Samtang si Herro, mipakita og all-around game pinaagi sa 12-of-20 shooting ubanan sa lima ka rebounds ug tulo ka assists. Ang 21-anyos nag average og 20 puntos karon nga season bisan paman kanunay siyang gikan sa bench.

Si Devin Booker maoy nanguna sa Phoenix nga adunay 26 puntos.