Human sa duha ug tunga ka tuig mobalik na sa aksiyon ang sharp-shooting guard sa Golden State Warriors nga si Klay Thompson karong adlawa batok sa Cleveland Cavaliers.

Opisyal na nga gianusiyo ni Thompson ang iyang pagbalik pinaagi sa Instagram.

Si Thompson mao ang backcourt partner ni Stephen Curry, ang duha gitawag og “Splash Brothers” tungod puros kini mga hingigo labi na sa three-point area.

Ang 31-anyos nga si Thompson wa na makaduwa sukad sa iyang torn ACL sa left knee atol sa Game 6 sa 2019 NBA Finals diin gilupig sa Toronto Raptors ang Warriors.

Sa dihang nagpaalim si Thompson sa ACL injury, naigo napud kinig laing malas kay nagisi ang iyang right Achilles tendon atol sa iyang solo practice niadtong Nobiyembre 2020.

Gikalipay ni Draymond Green ang pagbalik ni Thompson kay siguro kining makatabang sa kampanya sa Golden State karon nga season.

“The light at the end of the tunnel, you can see it,” batbat ni Green. “I was very excited to see him walking off and embracing that love, holding his hands up. It was great. I’ve seen what he’s been through the last 2 1/2 years and it’s not pretty.”

Maayo ang gipakita nga labok sa Warriors karon nga season nga adunay 29 ka daog batok siyam ka pilde, ikaduha nga best record sa NBA regular season sunod lamang sa Phoenix Suns (30-9).

Usa sa memorable nga scoring performances ni Thompson mao ang 60-point game niya niadtong Disyembre 2016 ug ang 37 puntos sa usa lamang ka quarter niadtong January 2015.