Usa ka drayber sa traysikad nga hubog nadasmagan-patay sa national highway sa Barangay Guimbuangan, lungsod sa Barili, alas 8:30 sa gabii, Biyernes, Enero 7.
Namatay sa tambalanan si Richard Pasigna, 46, ulitawo, trisikad driver ug nagpuyo sa nahisgutang lugar.
Gitanggong si Mario Manapsal, 39, minyo ug taga Brgy. Malalay, lungsod sa Ronda, nagmaneho sa Toyota Hilux Pick up, nga gipanag-iya sa munisipyo sa Ronda.
Si Police Staff Sgt. Jeffrey Alpas sa Barili Police Station nga nahinabi sa SunStar Superbalita Cebu nagkanayon nga ang biktima hubog kini nga nag-inom uban sa mga higala.
Ang drayber nga si Manapsal, mibutyag kanila nga gikan siya sa dakbayan sa Sugbo ug padulong mopauli sa lungsod sa Ronda.
Paspas iyang dagan unya ngitngit ang dalan sa national highway.
Ang biktima nga hubog uban sa iyang mga higala. Kalit kini nga nilabang hinungdan nadasmagan ug nakaangkog grabing kadaot sa ulo ug lawas.
Gidala sa driver ngadto sa Provincial Hospital sa Barili apan nakabsan sa kinabuhi.
Gibutyag ni Alpas nga dunay nakab-ot nga amicable settlement sa pamilya.