Nasunog ang usa ka abandunadong panimalay sa Gemsville Subdivision, Barangay Lahug, dakbayan sa Sugbo kagahapon sa hapon, Enero 9.
Way gikatahong naapektohang kinabuhi sa naasoy nga sunog nga napawong dayon sa kabomberohan ug wa na makatakod sa laing balay.
Samtang, usa ka balay ang naugdaw sa sunog sa Mighty Villa Subdivision sa Barangay Bulacao, siyudad sa Sugbo, niadtong Sabado, Enero 8, alas 7:23 sa gabii.
Si FO3 Emerson Arceo sa Cebu City Fire Office (CCFO), nibutyag nga usa ka balay ang naugdaw sa ground floor nga bahin nga gipanag-iya sa usa ka Benjie Quijano.
Dugang ni Arceo, sa ilang inisyal nga pakisusi nigawas nga ang pamilyang Quijano nabalikan na sa ilang kuryente ug ilang nakita nga kuryente ang sinugdanan sa sunog.
“Duna naman sila suga sa among pagsusi. Electrical matter to siya kay ang katong outlet sa ilang ground floor posibleng nag-spark unya ang sofa nga naa sa duol mao to didto nikatap ang kayo,” matod ni Arceo.
Sa alas 7:39 sa gabii, nakontrola sa kabomberohan ang sunog samtang sa pagka alas 7:42 sa gabii, gideklara na nga fire out.
Gibanabana sa CFFO nga moabot sa P108,000 ang danyos sa maong sunog.